Aqtóbe óńirindegi keńestik qýǵyn-súrgin zobalańy jaıly kitap jaryqqa shyqty
Aqtóbe oblysynyń ákimdiginde óńir basshysy Ońdasyn Orazalınniń tóraǵalyǵymen saıası qýǵyn-súrgin qurbandaryn aqtaý jónindegi óńirlik komıssııanyń otyrysy ótti.
Óńirlik komıssıanyń toǵyz jumys tobynyń quramyna qyryq ǵalym, sarapshy, murajaı men muraǵat qyzmetkerleri, qoǵamdyq qaıratkerler kirdi.
Jyl basynan beri olar saıası qýǵyn-súrgin suraqtary boıynsha muraǵat qujattaryn keń aýqymda zerttep, Yrǵyz, Baıǵanın, Temir jáne Oıyl aýdandaryna ǵylymı ekspedıtsııa jasady.
Nátıjesinde repressııaǵa ushyraǵan azamattardy óńir aýmaǵynda jappaı kómgen oryndardyń kartalarynyń jobasy ázirlendi.
«Aqtóbe óńirindegi keńestik qýǵyn-súrgin zobalańy» atty kóptomdy kitaptyń birinshi bólimi shyǵyryldy.
Onda oblystyq komıssııa músheleriniń ǵylymı maqalalary jınalǵan.
«Qazaqtyń danasy Áıteke bıdiń bir sózi bar. «Eldi qorqytyp basqarma, oqytyp basqar» degen. Qorqytyp basqarý ol totalıtarızm, oqytyp basqarý ol demokratııa. Búkil Keńes úkimetiniń tarıhy bul – totalıtarızm. Búgin biz sol qýǵyn-súrgin saıasatynyń keıbir tusyn, ásirese 30-jyldardaǵy tarıhyn zerttep jatyrmyz. Bul eń bir aýyr jyldar boldy. Bul zertteý eki baǵytta júrip jatyr. Birinshiden, belgili bir qýǵyn-súrginge ushyraǵan áleýmettik toptar. Mysaly, Alash, qoǵam qaıratkerleri, sol kezdegi totarıtarlyq júıege qarsy kúresken kóterilisshiler, rýhanı kósemderimiz. Ekinshiden, ár tulǵany jeke zertteý qajet. Ómir joly, sot protsesi tarıhqa kerek. Ózim dinı qaıratkerge qatysty teorııalyq, metodologııalyq tusyn zerttep júrmin. Bul jumys jýyq arada bitedi dep aıta almaımyz», - dedi fılosofııa ǵylymdarynyń doktory, professor Amangeldi Aıtaly.
Jalpy jyl basynan beri oblystyq komıssııa muraǵatta saqtalǵan 6 333 isti zerttedi.
Onyń ishinde dinı qyzmetkerlerdi qýdalaý jáne dinı mekemelerdi kúshtep jabý, múlkin tárkileý derekteri anyqtalyp, tergeldi.
Otyrys sońynda oblys ákimi jumys tobynyń qyzmetin jetildirýge, ǵalymdar men zertteýshilerdiń jumysyna qolaıly jaǵdaı jasaýǵa baǵyttalǵan birqatar tapsyrmalar berdi.
«Tek jergilikti muraǵattardy ǵana emes, bizdiń oblystyń aýmaǵyndaǵy saıası qýǵyn-súrgin týraly málimetter bar sheteldik muraǵattar qoryn da zertteý qajet dep esepteımin. Sol úshin jergilikti atqarýshy hám quzyrly organdarǵa tıisti qolaıly jaǵdaı jasaýdy tapsyramyn»,- dedi Ońdasyn Orazalın.
Belsendi ári jemisti zertteý jumystaryn júrgizgen óńirlik komıssııanyń birqatar múshesi oblys ákiminiń alǵys hatymen jáne estelik syılyqtarmen marapattaldy.
