Aqtóbe óńirinde qyzý jumys
ASTANA. QazAqparat - Parlament Májilisindegi tyńdaýlardan keıin Aqtóbe oblysynyń ákimi Berdibek Saparbaev sý tasqynynan japa shekkenderge qandaı kómek kórsetilip jatqanyn jýrnalısterge bergen suhbatynda aıtyp berdi. Ol úıler men azamattardyń jeke múlikteriniń qanshalyqty zardap shekkenin, zaqymdanǵanyn aıqyndaıtyn arnaıy komıssııa qurylǵanyn atap kórsetti.
«Osy komıssııanyń sheshimimen kimge jáne qansha qarajat bólinetini anyqtalady. Biz úıleri qırap qalǵandarǵa páterler beremiz. Kimde-kim jeke úı alǵysy kelse jáne de olar jeke turǵyn úı qurylysy kezeginde tursa, olarǵa jer beremiz. Óte muqtaj bolǵandarǵa - qurylys materıaldaryna 1 mıllıon teńgeden qarajat bólemiz. Biraq mynadaı shartpen: bólingen qarajatqa biz qurylys materıaldaryn satyp alamyz, qurylyspen ózderińiz aınalysasyzdar. Ózderi salýǵa múmkindigi joqtarǵa, qurylys kompanııasyn nemese qurylysshylardy taýyp beremiz», - dep naqtylady B. Saparbaev.
Ákimniń aıtýynsha, búginge deıin Aqtóbe oblysynda sý tasqynynan zardap shekkenderge 64 mıllıon teńge tólengen.
«Jumys bastalyp ketti, odan ári de jalǵasa beredi. Búgingi kúnge 64 otbasyna 1 mıllıonnan teńge bólindi», - dep qorytty oblys basshysy.
Sondaı-aq Aqtóbe oblysynyń ákimi Berdibek Saparbaev Qarǵaly aýdanyndaǵy birqatar sharýa qojalyqtaryna baryp, kóktemgi egis naýqanynyń bastalýymen tanysty, aýdannyń aýyl sharýashylyǵy qurylymdarynyń basshylarymen kezdesti, dep habarlaıdy aımaq basshysynyń baspasóz qyzmeti.
Belgili bolǵandaı, bıyl Aqtóbe oblysynda 641 myń gektar jerge egin egý josparlanǵan. Egis alqaptary 2016 jylmen salystyrǵanda 74,2 myń gektarǵa ulǵaıatyn bolady. Dándi-daqyldar egýge 383,9 gektar jer belgilengen. Aýa raıy qolaıly bolǵan jaǵdaıda 480 myń tonna astyq jınalady dep kútilýde.
Qazir oblys aýdandarynda egin egý jumystary belsendi júrýde. Aýyl sharýashylyǵy basqarmasynyń málimetteri boıynsha óńirdegi aýylsharýashylyq qurylymdary kóktemgi dalalyq jumystardy júrgizý úshin sapaly tuqymdyq materıaldarmen, tehnıkamen jáne janarmaımen tolyqtaı qamtamasyz etilgen. Atap aıtqanda, QR AShM bólgen 8,8 myń tonna arzandatylǵan dızel otyny Aqtóbege tolyq mólsherde jetkizildi.
Oblys basshysy jekelegen kemshilikterdi de atap kórsetip, tıisti mamandarǵa, óńir basshylary men ózge de jaýapty jumyskerlerge shuǵyl sharalar qabyldaýdy tapsyrdy.
«Sýarmaly jerler Qarǵaly aýdanynda kóp. Ókinishke qaraı, olardyń jalpy aýmaǵynyń 33% ǵana aınalymda. Biz azyq-túlikti kóp berýge múmkindigi bar sýarmaly jerler alańyn barynsha keńeıtip, maldy jem-shóppen qamtamasyz etip, jumys oryndaryn qurýymyz kerek. Jalpy, oblystyń basqa aýdandarymen salystyrǵanda sizderde aýyl sharýashylyǵyn júrgizý úshin jaǵdaı jaqsy. Eger barlyq áleýet paıdalanylsa, Qarǵaly aýdany jalpy Aqtóbe aýmaǵyn negizgi aýylsharýashylyq ónimderimen qamtamasyz eter edi», - dedi oblys ákimi.
Bıyl Aqtóbe oblysynyń qurylǵanyna 85 jyl tolady. Oblys ákimi Berdibek Saparbaev osy aıtýly dataǵa baılanysty respýblıkalyq deńgeıdegi «Týǵan jerge taǵzym» sharasy aıasynda osy jylǵy qyrkúıekte «Aqtóbe - qutty meken» oblystyq forýmyn ótkizýdi usyndy.
Forýmdy ótkizýge qatysty máselelerdi talqylaǵan basqosýda uıymdastyrý komıtetiniń tóraıymy, oblystyq máslıhattyń hatshysy Sánııa Qaldyǵulova atqarylar is-sharalardy taǵy bir pysyqtap, jaýapty adamdarǵa naqty tapsyrmalar berdi. Jıyn barysynda Aqtóbe qalasy ákiminiń orynbasary Lázzat Orazbaeva osy aıtýly sharany aıtarlyqtaı ótkizý maqsatynda elektrondyq áleýmettik júıelerde júrgizilip jatqan jumystar jaıynda baıandady jáne qazaqsha, oryssha jáne aǵylshyn tilderinde forým týraly «Aqtóbe jerlesterin shaqyrady» degen ataýmen ashylatyn ınternet-saıt qurylyp jatqanynan habardar etti.
