Aqtóbe oqýshylaryna qajetti noýtbýk pen planshet áli jetkizilmeı jatyr
AQTÓBE. QazAqparat – Aqtóbede oqýshylarǵa úlestirilýi tıis kompıýter áli tolyq berilmedi. Oblystyq bilim basqarmasy jetkizýshi kompanııany sotqa berdi, dep habarlaıdy QazAqparat tilshisi.
Aqtóbelik oqýshylarǵa 1 qyrkúıekke deıin 12 550 kompıýter taratyldy. Bul oblystaǵy mektepterde bar tehnıka. Respýblıkalyq bıýdjetten qarjy bólinip, 19 myńnan astam kompıýter satyp alyndy. Biraq jetkizý máselesi áli sheshilmedi.
«Memlekettik satyp alý kezinde eki kompanııa jeńimaz atandy. Biri 11 kún keshiktilip, 2 myńnan astam kompıýterdi ákeldi. Noýtbýk pen planshetti jetkizetin ekinshi kompanııa talapty oryndamaǵan soń sotqa júgindik. Ótken aptada 185 planshet pen 765 noýtbýkty jetkizdi. Kompanııamen baılanysqan kezde 10-qarashaǵa deıin jetkizýge ýáde berdi. Mekemeler, demeýshilerimiz kómektesip jatyr. Olar balalarǵa tehnıka syılady», - dedi oblystyq bilim basqarmasynyń basshysy Lázzat Orazbaeva.
Aıta keteıik, jańa oqý jylynda oblys boıynsha 44 myńnan astam kompıýterge suranys berildi. Sonymen birge 18 myń otbasyna ınternet qajet ekeni belgili boldy. Bul otbasyndaǵy balalar sany 27 myńnan asady.
«Qazirgi kezde uıaly baılanys kompanııalaryń modemi taratyldy. Baılanys kompanııalarymen kelisim bar. Oblys boıynsha 18 myńǵa jýyq roýter taratyldy. Sim kartalary tek «Bilim» tarıfine qosylǵan. Odan shyǵyp, basqa tarıfti tańdaýǵa, kıno da qalaýǵa bolmaıdy», - dedi Lázzat Orazbaeva.
