Aqtóbe oblysynyń jármeńkesinde 5 tonna baýyrsaq taratylady
ASTANA. 9 qarasha. QazAqparat - Astanada ótip jatqan Aqtóbe oblysynyń jármeńkesinde óńir dástúri boıynsha 5 tonna baýyrsaq taratylady.
Bul týraly búgin jármeńkeniń ashylýynda Aqtóbe oblysynyń ákimi Arhımed Muhambetov málim etti.
Aıta keteıik, búgin Astana qalasynyń Ortalyq alańynda Mańǵystaý jáne Aqtóbe oblystarynyń aýylsharýashylyq jármeńkeleri ashyldy.
«Aqtóbe oblysy bul jármeńkege jalpy quny 60-70 mln. teńge bolatyn 130 tonna aýyl sharýashylyǵy ónimderin ákeldi. Sonyń ishinde 50 tonna kókónis, 40 tonna et pen et ónimderi, 12 tonna balyq (bekire) jáne taǵy basqa ónimder bar. Olardyń baǵalary Astana bazarlarynan keminde 15 paıyzǵa arzan. Bizdiń delegatsııanyń quramynda oblystyń 12 aýdanynyń jáne Aqtóbe qalasynyń kásipkerleri bar», - dedi A. Muhambetov.
Oblys ákiminiń atap kórsetkenindeı, aýyl sharýashylyǵy ónimderinen bólek, óńir aýqymdy mádenı, kontserttik baǵdarlamany ákelip otyr. Elorda sahnasynda Ǵ.Jubanova atyndaǵy fılarmonııanyń, «Alaqaı» qýyrshaqtar teatrynyń, oblystyq kórkemónerpazdar teatrynyń ártisteri óz ónerlerin kórsetetin bolady.
