Aqtóbe oblysynyń shalǵaı aýyldarynda balalar jańa mektepte oqıtyn boldy
Shalǵaı aýyldaǵy eki mektep zamanaýı úlgimen salynǵan. Munda sport zal, kompıýterlik jáne lıngafon klastary bar. Balalar úshin hımııa, bıologııa kabınetteri de ashylǵan. Infraqurylym júıleri tartylǵan, dárethanasy mektep ishinde. Tuńǵysh Prezıdent kúni merekesine oraı esigin aıqara ashqan bilim ordasyn oblys ákimi aralap kórdi.
«Elbasymyz óskeleń urpaqqa zaman talabyna saı sapaly bilim alý úshin barlyq tıisti jaǵdaı jasaý kerektigin aıtqan bolatyn. Osyǵan oraı, balalar sapaly bilim men tárbıe alýy úshin bar múmkindikti jasap jatyrmyz. 2019 jyly 10 mektep paıdalanýǵa berildi. Oblysta balabaqsha sany da kún sanap artyp keledi. Al Yrǵyz aýdanynyń ortalyǵynda mektep-ınternat salynyp jatyr. Internat 100 orynǵa shaqtalǵan», - dedi óńir basshysy Ońdasyn Orazalın.
Aýyl mektebinde oqýlyq jetkilikti. Ázirge suıytylǵan otynmen jylytylady. Aldaǵy ýaqytta kógildir otyn tartylyp, jylytý qazandyǵyna qosylady. Óńir basshysy oblystyq Bilim basqarmasynyń basshysy Lázzat Orazbaevaǵa mektepterdi sapaly ınternet júıesimen qamtamasyz etý máselesin sheshýdi tapsyrdy.
«Men jas mamanmyn. Ózim 2016 jyly aýyl sharýashylyǵy kolledjin bitirip, Otan altyndaǵy boryshymdy ótep keldim. Joǵary oqý ornyndaǵy bilimimdi ári qaraı jalǵastyryp júrmin. Stýdent ári jas muǵalim retinde aýyldy kóterýge keldim. Jańa mektep bizdi jigerlendirip, tyń kúsh berdi. Endi munda bilikti urpaq tárbıelenedi», - dedi mektep muǵalimi Abylaı Syrabaı.
