Aqtóbe oblysynyń Oıyl aýdanynda 105 turǵyn aldyn ala evakýatsııalandy
Oıyl ózeniniń arnalaryndaǵy sý deńgeıine monıtorıng júrgizilip otyr. Kórsetkishter boıynsha jedel sheshimder qabyldanatyn gıdrobeketter qoıyldy. Ótken táýlikte Oıyl aýdanynyń Ekpetal jáne Qaratal aýyldarynan 105 turǵyn aldyn ala evakýatsııalandy.
Bir táýlik ishinde Baıǵanın, Qobda, Yrǵyz, Mártók, Muǵaljar, Oıyl, Temir jáne Shalqar aýdandarynda ınertti materıal salynǵan 10 000-nan astam qap tóseldi, 30 myńǵa jýyq tekshe metr sý soryldy.
Qobda aýdanynyń Qobda aýylynda 51 turǵyn úıden sý sorý jumystary júrip jatyr. Buǵan deıin evakýatsııalanǵan 74 adam ýaqytsha ornalastyrý pýnkterinde, 230 adam týystarynyń úılerinde.
Jalpy, sý tasqyny kezeńi bastalǵannan beri Aqtóbe oblysy boıynsha 390 myńnan astam tekshe metr sý soryldy, 26,1 shaqyrym aryq tazartyldy, ıntertti materıal salynǵan 24 myńnan astam qap tóseldi, uzyndyǵy 175 metr ýaqytsha bóget salyndy, uzyndyǵy 500 metr jaǵalaýdy nyǵaıtý jumystary júrgizildi. Oblys boıynsha eldi mekenderden shamamen 525 myńǵa jýyq tekshe metr qar shyǵaryldy. Aqtóbe qalasyndaǵy «Saıa» turǵyn alabynyń joǵarǵy jaǵynda jáne Qarǵaly aýdanynyń Petropavlovka aýylynda 200 metr sý burý kanaly qazyldy.
Jaǵdaı turaqty baqylaýda. Kóktemgi sý tasqyny kezeńinde jedel sharalar qabyldaý maqsatynda qurylǵan oblystyq shtab táýlik boıy jumys isteıdi. «Jedel jelige» aqparattyq sıpattaǵy 116 qońyraý túsken.
