Aqtóbe oblysynyń Oıyl aýdany «qyzyl» aımaqqa kirdi
Aqtóbe oblysyndaǵy Oıyl aýdany 17 naýryz kúni karantın sharasyn kúsheıtti . Arada bir aptadan astam ýaqyt ótkende aýdan «qyzyl» aımaqqa ótti.
«Búginnen bastap sýpermarketterdiń jumysy saǵat 8:00-den 20:00-ge deıin shekteldi. Bazarlar jumys kúnderi ishki tártip boıynsha qyzmet kórsetedi. Medıtsınalyq ortalyqtar, kabınet, stomatologııaǵa aldyn ala jazylyp barý kerek. Bank, halyqqa qyzmet kórsetý ortalyǵy, poshtanyń jumys ýaqyty saǵat 09:00-den 18:00-ge deıin shekteldi. Mektepke deıingi mekemelerdegi kezekshi toptarda bala sany 15-ten aspaýy qajet. Dinı obektilerde ujymdyq is-sharalar ótkizýge bolmaıdy. Qoǵamdyq tamaqtaný oryndarynda adam sany 30-dan aspaýy tıis. Munda saǵat 09.00-den 20.00-ge deıin jumys isteýge ruqsat berilgen. Bul rette ujymdyq, saltanatty, otbasylyq, estelik jáne basqa da buqaralyq is-sharalardy ótkizýge qatań tyıym salynady», - dep habarlady oblystyq sanıtarııalyq-epıdemıologııalyq baqylaý departamentiniń baspasóz qyzmeti.
Jalpy aýdany 2 myń sharshy metrden aspaıtyn azyq-túlik satpaıtyn dúkender, saýna, basseın, jabyq bazarlar, sport keshenderi, sporttyq- saýyqtyrý ortalyqtary, fıtnes ortalyqtary, saýda úıleri, saýda jelileri senbi, jeksenbi kúnderi jumys istemeıdi.
«Oıyl aýdanyna baratyn jáne aýdannan shyǵatyn barlyq adamǵa mindetti túrde termometrııa jáne saýalnama júrgiziledi. Sanıtarııa beketteri uıymdastyrylady. COVID-19 belgisi bar barlyq adamǵa zerthanalyq tekserý júrgizilip, karantındik statsıonarda 2 táýlikke oqshaýlanady» dep habarlady baspasóz qyzmeti.
