Aqtóbe oblysynyń medıtsına mekemelerinde karantın talaptary kúsheıtildi
AQTÓBE. QazAqparat – Aqtóbe oblysynda shekteý sharasy kúsheıtildi, dep habarlaıdy QazAqparat tilshisi.
Aqtóbe oblystyq bas memlekettik sanıtarııalyq dárigeri Nursulý Berkimbaevanyń Qaýlysymen óńirde shekteý sharalary kúsheıtildi.
Búgin jarııalanǵan jańa Qaýlyǵa sáıkes, medıtsınalyq uıymdar ishi «las» jáne «taza» aımaqtarǵa bólinedi.
Menshik túrine qaramastan barlyq densaýlyq saqtaý uıymy kelýshilerdiń dene temperatýrasyn ólsheýi tıis.
COVID-19 anyqtalǵan jaǵdaıda naýqastardy oqshaýlaýǵa ızolıator uıymdastyrylýy qajet.
Statsıonarǵa josparly emdeýge jatqyzylǵan kezde naýqastarda koronavırýsqa PTR-testileýdiń anyqtamasy bolýy tıis.
«Menshik túrine qaramastan oblystaǵy statsıonarlarda medıtsına qyzmetkerleriniń bólimshe arasyndaǵy qozǵalysy shekteledi. Patsıentterge týystarynyń kelýine tyıym salynady. Qajet bolǵan jaǵdaıda qashyqtan keńes berý usynylady. Úıdegi karantınde jatqan adamdar úshin ýaqytsha eńbekke jaramsyzdyq paraqtaryn medıtsınalyq uıymdarǵa barmaı rásimdeý uıymdastyrylady», - dep jazylǵan Qaýlyda.
