Aqtóbe oblysynyń Qobda aýdanyndaǵy toǵanda balyq qyryldy
12 sáýirde QR Ekologııa, geologııa jáne tabıǵı resýrstar mınıstrligi Balyq sharýashylyǵy komıtetiniń «Tobyl-Torǵaı oblysaralyq basseındik balyq sharýashylyǵy» ınspektsııasyna Aqtóbe oblysynyń Qobda aýdany Jarsaı aýylynyń Kýzmın toǵanyndaǵy balyqtardyń qyrylǵany týraly habarlama tústi.
«Sol kúni ózara is-qımyl shemasyna sáıkes, ınspektsııa mamandary Veterınarııalyq baqylaý jáne qadaǵalaý komıtetiniń Aqtóbe oblystyq aýmaqtyq ınspektsııasy jáne Aqtóbe oblysynyń Tabıǵı resýrstar basqarmasymen birlesip osy sý aıdynyna tekserý júrgizdi. 4 tonna óli móńke balyǵy jınalǵan. Ol balyqtar joıyldy», delingen habarlamada.
Sonymen qatar, zerthana zertteýin júrgizýge toǵan sýy men balyqtan synama alyndy.
«Qazirgi boljam boıynsha balyqtardyń qyrylýyna sý deńgeıiniń jetkiliksizdiginen (1,0-1,5 m) qysta sýda otteginiń bolmaýy sebep bolýy múmkin. Balyqtyń qyrylýynyń naqty sebebin tıisti zerthanalyq zertteý júrgizilgennen keıin qosymsha habarlanady», delingen habarlamada.
Aıta keterligi, Kýzmın toǵany Qobda aýdanynyń Jarsaı aýyldyq okrýginde ornalasqan. Toǵannyń aýdany 3 gektar. Ol balyq sharýashylyǵy sý aıdyndarynyń tizimine enbegen. Toǵan mal sýarý úshin salynǵan. Sý qoımasynyń janynda óndiristik obekti joq.
