Aqtóbe oblysynyń eńbek ardagerleri men «jomart júrekter» marapattaldy
«El qalaýy – Elbasy» atty shara Jekpe-jek saraıynda ótti. Oǵan óńirdegi jastar men belsendi azamattar, kásipkerler men qoǵam qaıratkerleri qatysty. «Egemendigim – eldigim» mýzykalyq bı qoıylymymen ashylǵan shara kezinde Tuńǵysh Prezıdent Nursultan Nazarbaevtyń ómiri men eńbek jolyna negizdelgen «Máńgilik el saltanaty» beınematerıaly kórsetildi.
«Bul jalpyhalyqtyq meıram – elimizdiń Tuńǵysh Prezıdenti – Elbasy Nursultan Ábishuly Nazarbaevtyń Qazaqstannyń ıgiligi, abyroı-bedeliniń artýy úshin atqaryp jatqan eńbeginiń, álem qaýymdastyǵynyń aldyndaǵy zor abyroıynyń zańdy nátıjesi. Bul, halqymyzdyń Tuńǵysh Prezıdentine, Ult kóshbasshysyna shynaıy rızashylyǵyn bildirip, ózimizdiń derbes «Qazaqstandyq jolymyzǵa» kóz júgirtetin, oı qorytatyn sát. Sol bir kezeńde, qazaq eli óziniń Tuńǵysh Prezıdenti – Nursultan Ábishuly Nazarbaevty biraýyzdan saılap, Elbasymyz ata-babamyzdyń ǵasyrlar boıy asyl armany bolyp kelgen egemen elimiz, táýelsiz Qazaqstandy qurý jolyndaǵy júgi aýyr amanatyn arqalady. Osy kezeńnen bastap jańa Qazaqstannyń táýelsiz joly qazaq shejiresiniń altyn joldary retinde jylnamaǵa jazylýda», - dep atap ótti aımaq basshysy Ońdasyn Orazalın.
Oblys ákimi shara barysynda qaıyrymdylyq jasap, demeýshilik kórsetken 7 azamatty «Jomart júrek – 2019» respýblıkalyq baıqaýynyń nomınatsııalarymen marapattady. Sonymen qatar, aımaq damýyna qosqan úlesteri úshin 7 eńbek ardagerine «Oblysqa sińirgen eńbegi úshin» medalin tabystady.
«Ózim Aqtóbe oblystyq balalar aýrýhanasynda jumys isteımin. 40 jyldan astam ýaqyt boıy balalardy emdep, olarǵa operatsııa jasap júrmin. Bıyl Oıyl aýdanyna baryp, balalardy arnaıy qabyldap, sol jerde em júrgizdim. Ońaltý jumystaryn da ózim baqyladym. Eńbektiń elengeni jaqsy», - dedi «Eren eriktilik» nomınatsııasynyń ıegeri Bolat Medetov.
