Aqtóbe oblysynyń ekonomıkalyq ósimi bes paıyzdy qurady
ASTANA. QazAqparat - Aǵymdaǵy jyldyń toǵyz aıynda Aqtóbe oblysynyń ekonomıkalyq ósimi bes paıyzdy qurady. Bul týraly Ortalyq kommýnıkatsııalar qyzmetindegi baspasóz máslıhatynda Aqtóbe oblysynyń ákimi Berdibek Saparbaev málim etti, dep habarlaıdy QazAqparat.
«Elbasynyń óńir halqynyń ál-aýqatyn arttyrý men áleýmettik-ekonomıkalyq damýyn qamtamasyz etý boıynsha tapsyrmasyn oryndaı otyra ekonomıka ósiminiń bes paıyzǵa ósýine qol jetkizdik. Oń dınamıka barlyq sektorlarda qamtamasyz etilgen, - dep atap ótti B. Saparbaev.
Sonymen, óndiristik ósim 4,7 paıyzdy qurap, jalpy alǵanda 1077 mlrd teńgeniń óndiristik ónimi óndirildi. 9,1 paıyz deńgeıdi quraǵan óńdeý ónerkásibiniń ósimi boıynsha Aqtóbe oblysy Qazaqstan boıynsha kósh basynda tur.
Oblys ekonomıkasyna tartylǵan ınvestıtsııa eseptik kezeńde 21,1 paıyzǵa ósken (268 mlrd teńge).
Munymen qosa, aýyl sharýashylyǵynyń jalpy kólemi 3,9 paıyz (145,5 mlrd teńge), áreket etetin ShOB sýbektileriniń sany 10,9 paıyz (50,7 myń birlikke deıin), bólshek saýda aınalymy 7,9 paıyz deńgeıinde ósimmen qamtamasyz etilgen.
Al qurylysta jumys kóleminiń ósimi 10,3 paıyzdy qurap, 390 myń sharshy metr turǵyn úı paıdalanýǵa berildi. Jyl qorytyndysy boıynsha 650 myń sharshy metr turǵyn úı tapsyrylady dep josparlanýda.
Al ótken jylmen salystyrǵanda salyq kólemi 72,5 mlrd teńgeni qurap, 7 paıyzǵa artty.
Ekonomıka ósimi men áleýmettik turaqtylyq óńirdegi jumyspen qamtýdy saqtap qalýǵa múmkindik berdi. Jumyssyzdyq 4,8 paıyz deńgeıinde. 15,2 myń jańa jumys oryndary quryldy. Jyl sońyna deıin 1,3 myń jańa jumys orny qurylmaq.
