Aqtóbe oblysynyń aýdandaryna jańa reıster ashylýy múmkin

Aqtóbe óńirlik kommýnıkatsııalyq qyzmetinde oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev qosymsha áýe reısterin ashý kezindegi qıyndyqtarǵa toqtaldy. Shetelge jáne Qazaqstannyń basqa qalalaryna reıs ashý qıyn. Basty sebep - jolaýshy az.

«Aqtóbe áýejaıyn tolyqqandy paıdalaný úshin jańa reıster ashý jumysy kún tártibinde tur. QR Syrtqy ister mınıstrligi, elshilermen birge jumys istep jatyrmyz. Biraq ázirge jańa reıs ashý týraly usynysty áýe kompanııalar quptamaı otyr. Jolaýshy az. Dýbaı, Mysyr, Túrkııaǵa jaz aılarynda charterlik reıster qatynaıdy. Bizge charterlik emes, turaqty áýe reısi qajet. Máselen, Qytaı eli shaǵyn ushaqtardy qabyldamaıdy. Kem degende 200 jolaýshysy bar ushaq qatynaýy tıis. Al bizde bir ushaqty toltyrý qıyn. Qazirgi kezde ózge elderge barý úshin Aqtaý, Atyraý, Oral, Almaty, Astana qalalaryna aıaldaıtyn ushaqtar bar»,- dedi Aqtóbe oblystyq jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev.

Aqtóbe oblysynyń ákimdigi jańa reıs ashý úshin Qazaqstandaǵy áýe kompanııalary men Aqtóbede týrıstik agenttikterdiń basyn qosyp, usynystar men suranystar qaraldy. Kezdesý kezinde týrıstik operator qurý týraly ortaq oıǵa keldi. Sonymen qatar, Aqtóbe oblysynda aýdandarǵa jańa reıs ashylýy múmkin.

«Investıtsııa jáne damý mınıstrligi shaǵyn áýe reısterin damytý josparyn jasady. Aqtóbe oblysynyń Yrǵyz aýdanynda áýejaı jóndelip, alǵashqy reıs ushyryldy, sýbsıdııa berildi. Biraq suranys bolmaı, toqtap qaldy. Endi Shalqar aýdanyna jańa reıs ashýdy josparlap otyrmyz. Aldymen áýejaı jóndeledi. Baıǵanın aýdany da tizimde bar. Eger «Aqtóbe-Atyraý» tasjoly salynsa, ol aýdanǵa suranys bolmaýy múmkin»,- dedi Aıazbaı Osmanǵalıev.

Aıta keteıik, Aqtóbedegi týrıstik agenttikter kıeli jerlerge baratyn arnaıy avtobýstardy ashý týraly suranys berdi. Qazirgi kezde bul suraqtyń sheshimi qarastyrylyp jatyr. Ásirese, Yrǵyz aýdanyndaǵy Jamanshyń kraterine qyzyǵatyndar kóp.