Aqtóbe oblysynyń ákimi óńirde koronavırýs indetiniń nelikten órship ketkenin aıtty
AQTÓBE. QazAqparat – Memleket basshysynyń tapsyrmasymen Aqtóbe oblysynyń ákimi Ońdasyn Orazalın tikeleı efır arqyly betperde kıip, qolǵap kıip júrýge keńes berdi, dep habarlaıdy QazAqparat tilshisi.
Aqtóbe oblysy boıynsha 282 adam indetke shaldyqsa, 200-den astamy emdelip shyqty.
«Іndet bizge syrttan keldi. Birqatar jerlesimiz aldyn ala bilse de shetelge shyǵyp, elge aýrýdy juqtyryp oraldy. Oblys boıynsha 282 naýqas tirkeldi. Onyń 59-y shetelden kelgen, ózgesi naýqastarmen qarym-qatynasta aýrý juqtyrdy. Teńiz kenishinen kelgen 8 jumysshydan aýrý anyqtaldy. Reseıden kelgen stýdentterdiń 18-i indetke shaldyqqan. Aldyńǵy shepte jumys istegen quqyq qorǵaýshylar arasynan vırýs juqtyrǵandar boldy. Arasynda esh belgisi bolmasa da koronavırýs tabylǵan adamdar boldy. Josparǵa saı barlyǵy 1012 kereýet daıyndaldy. Onyń 135-i ınfektsııalyq, 270 provızorlyq, 607 karantındik. Aldyn alý sharasynyń nátıjesinde indettiń keń taralýyna jol bermedik. Zalalsyzdandyrý jumystary oń nátıje berdi. Rezervte 1735 kereýettik oryn bar», - dedi oblys ákimi Ońdasyn Orazalın.
Aıta keteıik, oblysta 4 zerthana jumys istep tur. Kúnine 2 myńǵa jýyq adamnyń analızin zertteýge múmkindik bar.
«Sál bosańsı bastaǵanda indet órship shyǵa keldi. Aýrý juqtyrǵan naýqastar sany da kúrt ósti. Oǵan birneshe sebep bar. Birinshiden, qaýipti indetti joqqa shyǵaryp, sanıtarlyq talapty saqtamaý, ekinshiden, tótenshe jaǵdaı toqtap, karantındik rejımdi bosańsytý saldary. Úshinshiden, turǵyndar arasynda belsendi skrınıng ótkizý nátıjesi. Osynyń ishinde eń bastysy ári qaýiptisi – vırýstyń bar ekenine senbeý, saqtaný sharalaryna beıjaı qaraý. Osyndaı túsinikte júrgender qoǵamǵa eń qaýipti adamdar dep esepteımin. Óıtkeni olar osy áreketterimen kópshilikke zııanyn tıgizýde.
Ókinishke qaraı, indetke shaldyǵyp, onyń zardabyn kesh túsingender de kezdesýde. Aramyzda adam kóńiline kúdik salatyn ártúrli jalǵan aqparat taratýshylar da jeterlik. Oıdan qurastyrylǵan oqıǵalar men jalǵan kýálik berýshiler jasaǵan aýdıo, vıdeo materıaldar kúnnen kúnge kóbeıýde. Ony uıymdastyrýshylar elimizdiń qaýipsizdigine zııan keltirýshi. Al soǵan senip, áleýmettik jelide taratýshylar sonyń qolshoqpary bolyp otyrǵandar.
Bilip, bilmeı istese de olar siz ben bizdiń ómirimizge zııan keltirýshiler. Ol adamdar vırýstan da qaýipti. Oǵan tek qana osylaı baǵa berýimiz kerek. Álem bolyp osy indetpen kúresip jatqan barlyq adamzat aqymaq pa? Iıa jalǵan aqparatqa senýshi skeptıkter ǵana aqyldy ma? Alpaýyt elderdiń basshylary osy indetke dýshar bolyp, emdelýi erikkenniń ermegi me? Álde túsiný, sený úshin ózimiz, jaqynymyz naýqastaný kerek pe?», - dedi óńir basshysy.
Eske salsaq, erteńnen bastap óńirde balabaqsha jumysyn bastaıdy.
