Aqtóbe oblysynyń ákimi halyq aldyna nege shyqpaǵanyn túsindirdi
Aqtóbe oblysynyń ákimi Ońdasyn Orazalın búgin alǵash ret tilshiler aldynda suraqqa jaýap berdi.
Ol qazir oblystaǵy ahýaldyń turaqtanǵanyn aıtty.
«Tirshilikke qajetti barlyq nysan, qoǵamdyq kólikter shtattyq rejımde jumys isteýge kirisip jatyr. Sondaı-aq saýda, iri óndiris oryndary jáne qarjy mekemeleri óz jumysyn jandandyrdy. Degenmen qazir koronavırýs ınfektsııasynyń úshinshi tolqynynyń órshýine baılanysty jaǵdaı kúrdelene tústi. Bir túnde 323 derek tirkeldi. Odan ári kóbeıýi múmkin. Kereýet sanyn kóbeıtip, dári-dármek qory jasaqtaý tapsyryldy. Aýrýhana men dárihana da ázirlendi. Jedel járdem jumysy da baqylaýǵa alyndy», - dedi oblys ákimi Ońdasyn Orazalın.
Keıin tilshilerdiń suraǵyna jaýap berip, tótenshe jaǵdaı kezinde qalaı jumys istegenin, halyq aldyna nege shyqpaǵanyn túsindirdi.
«Qan tógilse, mańdaǵan adam qyrylsa, bári basqasha bolar edi. Meniń bar is-áreketim - sony boldyrmaý. Qolymyzdan kelgenshe tártipke shaqyrdyq, basý aıttyq. Qaramaǵymdaǵy qyzmetkerlerge «baryp, túsindirý jumystaryn júrgizińder» dep tapsyrma berdim. Biraq adamdardyń basy qosylmady, dıalogqa baratyn bireýi de bolmady. Biren-sarań top keldi. Ártúrli top. Olardyń arasynda destrýktıvti dinı aǵym ókilderi, Bestamaqtaǵy shoshqa fermasynyń múddesin oılaǵandar kezdesti. Keıbiri alańǵa jaǵdaıdy kórý úshin kelgen eken. Ekstremıstik top músheleri de kezdesti. Tergeý kezinde bári anyqtalady. Eshteńe suraýsyz qalmaıdy. Meniń Aqtóbege kelgenime úsh jyl. Men zańsyz jıynǵa bir de bir ret shyqqan joqpyn, túsinikteme bergen de joqpyn. Bul - meniń ustanymym. Zańsyz jınalǵandarǵa barý, olarǵa ýáde berý zańdastyrylǵandaı bolar edi. Qaramaǵymdaǵy adamdardy jibergenim ras. Basý aıtqandaı boldy. Kóbi túsingen joq. Biraz óńirde áriptesterim shyqty. Bir de bireýi bitimge kelgen joq. Qaıta balaǵattady, qol jumsaýmen aıaqtaldy», - dedi Ońdasyn Orazalın.
Oblys ákiminiń aıtýynsha, qańtardyń 5-nen 6-na qaraǵan túni adamdar ákimdikke kirdi. Al qańtardyń 6-nan 7-ne qaraǵan tańda quqyq qorǵaý organdary arnaıy operatsııa júrgizdi.
«Bılik ǵımaratta emes, bılik ákim bar jerde. Qalanyń ishinde boldym. Orazalın qantógiske jol bermedi degen atpen tarıhta qalady. Aqtóbeniń turǵyndaryna rızamyn. Ashýǵa salynǵan joq. Al oblys ákimdiginiń ǵımaratyn jóndep alamyz. Respýblıkalyq emes, óz bıýdjetimizdiń esebinen jóndeımiz», - dedi Ońdasyn Orazalın.
Sonymen birge tilshilerden jaýap alýǵa qatysty pikirin bildirdi.
«Tek jýrnalıster emes, meniń qaramaǵymdaǵy memlekettik qyzmetkerler, qala ákimi Ashat Shaharovqa deıin polıtsııaǵa shaqyryldy. Qarapaıym adamdar, ádeıi qylmystyq nıetpen kelgen adamdardyń bárin elekten ótkizemiz. Álde de jýrnalıster kýáger retinde shaqyrylýy múmkin. Oǵan túsinistikpen qarańyzdar. Telefondaryńyzdaǵy vıdeolar da mańyzdy. Dálel, aıǵaq retinde paıdalanylady. Bir de bir jýrnalıst qamaýǵa alynǵan joq. Eskere ketetin jaıt, alańda aldyńǵy shette turǵan quqyq qorǵaý organdarynyń qyzmetkerleri de kýáger retinde oqıǵa týraly aıtady. Oǵan renjimeńder, bári - quqyq qorǵaý organdarynyń jumysy. Reti kelse kómektesińder, aqparatpen bólisińder. Bizge keregi - eldegi turaqtylyq», - dedi oblys ákimi Ońdasyn Orazalın.
