Aqtóbe oblysynyń ákimi dinı aǵym ókilderine qatysty: Olardy «jaý» dep eseptemeıik

NUR-SULTAN. QazAqparat – Aqtóbe oblysynda 2 myńǵa jýyq adam dinı ahýal boıynsha esepte tur. Bul týraly óńir ákimi Ońdasyn Orazalın Ortalyq kommýnıkatsııalar qyzmetinde málim etti, dep habarlaıdy QazAqparat tilshisi.

«Meniń oıymsha, bul jerde burynǵy jyldarmen salystyrǵanda dinı ahýal sondaı kúrdelenip bara jatyr dep aıta almaımyz. Árıne, destrýktıvti dinı aǵymdarda júrgen biraz jerlesimiz bar. Biz túsinýimiz kerek. Olar da Qazaqstannyń azamattary, syrttan kelgen bóten adam emes. Sol turǵydan qaraýymyz qajet. Árıne adam bolǵan soń, onyń saıası da, dinı jaǵynan da kózqarasy ártúrli bolýy múmkin. Biz bir jaǵynan zaıyrly memleketpiz», - degen ákim Konstıtýtsııa boıynsha dinderge teń quqyq berilgenin eske saldy.

«Olarǵa biz «Ári ket» dep aıta almaımyz. Qolymyzdan kelgenshe artyq iske barmaǵanyn tileımiz. Mundaǵy birden-bir másele – olardy áleýmettendirý. Ózderine, janynda júrgen joldastaryna jumys usyný, balalaryn qalypty mektepterde oqytý sııaqty sııaqty baýyrǵa tartý sharalaryn jasap jatyrmyz. Ár aýdanda óziniń tıisti josparlary bar. Árıne, keıbir aýdandarda dinı ahýal óte kúrdeli de bolýy múmkin. Biraq oblysta burynǵy jyldarmen salystyrǵanda asyp bara jatqan problema joq. Deı turǵanmen bul baǵyttaǵy jumystardy jalǵastyramyz. Óıtkeni óńirde 2 myńǵa jýyq jerlesimiz destrýktıvti dinı aǵymdardyń esebinde tur. Biz ony jaý dep eseptemeıik. Ózimizdiń ishimizden shyqqan baýyrlar, jerlesterimiz. Bularǵa túsindirý, áleýmettendirý jumystaryn júrgizip, jumys ornyn taýyp berip, kásipkerlikpen aınalysýyna múmkindik jasaýymyz kerek», - dedi Ońdasyn Orazalın.