Aqtóbe oblysynyń ákimi birqatar sheneýnikti qyzmetinen bosatty
AQTÓBE. QazAqparat - Aqtóbe oblysynda joldardy durys salmaǵan, kópbalaly otbasylarǵa járdemaqy berý jumystaryn durys uıymdastyrmaǵan ákimdik sheneýnikteriniń biri qyzmetinen bosatylsa, biri eskertý aldy. Bul týraly oblys ákiminiń baspasóz qyzmetinen málim etti, dep habarlaıdy QazAqparat tilshisi.
Atap aıtqanda, búgin Aqtóbe oblystyq Jolaýshylar kóligi jáne avtomobıl joldary basqarmasynyń basshysy Aıazbaı Osmanǵalıev qyzmetinen ketti. Qurylys salasyna jetekshilik etetin oblys ákiminiń orynbasary Serik Tólenbergenov pen qala ákiminiń orynbasary Ybraıym Kózbaev ta jumys oryndaryn bosatady.
Atap ótilgendeı, olar joldardy jóndeý jáne abattandyrý jumystarynyń sapaly oryndalýyna tıisti baqylaý júrgizbegeni úshin qyzmetterinen aıyryldy.
«Qala ákimi Іlııas Ispanov Ybraıym Kózbaevqa jobalardy tapsyrýǵa eki apta berilgendigin atap ótti. Sondaı-aq óńir basshysynyń tapsyrmasymen oblys ákiminiń áleýmettik salaǵa jetekishilik etetin orynbasary Marat Toǵjanovqa, Aqtóbe qalasynyń ákimi Іlııas Ispanovqa, jumyspen qamtýdy úılestirý jáne áleýmettik baǵdarlamalar basqarmasynyń bashysy Qaırat Otarovqa qujattardy qabyldaý, óńdeý jáne kópbalaly otbasylarǵa ataýly áleýmettik járdemaqyny taǵaıyndaý jumystaryn tıisti dárejede uıymdastarmaǵany úshin eskertý túrindegi tártiptik jaza qoldanyldy», - delingen oblys ákiminiń baspasóz baıanynda.
Sheneýnikterdi jumystan shyǵarýǵa Facebook pen Instagram áleýmettik jelilerindegi turǵyndardyń aryz-shaǵymy da túrtki bolǵan. Ákimdikte ótken otyrys barysynda oblystyq sport, mádenıet, memlekettik satyp alý, densaýlyq saqtaý jáne bilim basqarmalarynyń jumystaryna da syn aıtyldy. Al Mártók aýdanynyń ákimi Jandos Baıyrhanov óz erkimen jumystan ketken.
«Oblys ákimdigindegi jumysyma úsh aı boldy. Osy ýaqytqa deıin tártiptik jaza sharalaryn qoldanǵym kelmedi. Aýyzsha ǵana eskertip keldim. Biraq, ókinishke qaraı, memlekettik organdardyń keıbir basshylary eskertýge atústi qarap, aldyn alýǵa tyryspady. Halyq úshin jumys istemegender, memlekettik organdarǵa júktelgen mindetterdi durys atqarmaǵandar jazalanatyn bolady, tipti jumystan bosatylady»,- dedi oblys ákimi Ońdasyn Orazalın.
Jıyn barysynda óńir basshysy stýdentter jataqhanasyn salý úshin ınvestorlardy belsendi túrde izdeý, abattandyrý jumystaryn kúsheıtý, kóshelerdi jaryqtandyrý, Aqtóbe qalasynyń kósheleri men aýlalaryn sanıtarlyq tazalaý boıynsha birqatar tapsyrmalar berdi.
«Barlyq memlkekettik organdardyń basshylaryna eskerterim: eger kimde-kim meniń atymnan belgilengen zań men erejelerge qaıshy keletin qyzmetterdi kórsetýge keletin bolsa, eń aldymen bul týraly maǵan habarlańyz. Meniń atymnan kelgender kim bolsa da ózime habarlańyz. Osyndaı ótinishti oryndaǵandar sol úshin jaýap beretin bolady», - dedi ákim.
