Aqtóbe oblysynyń 7 myńnan astam turǵyny 2019 jyly gazben qamtylady

AQTÓBE. QazAqparat - Aqtóbe oblysynda aýyldyq eldi mekenderdi gazben qamtamasyz etý boıynsha 19 joba iske qosyldy. Ol úshin bıýdjetten 6,4 mlrd teńge bólinedi, dep habarlaıdy QazAqparat tilshisi oblys ákiminiń saıtyna silteme jasap.

2019 jyly josparlanǵan 19 joba aıaqtalǵan soń Aqtóbe oblysyndaǵy 11 aýyldyń 7 myńnan astam turǵyny kógildir otyn jelisine qosylady. Bul halyqtyń ál-aýqatyn jaqsartýǵa jáne aýyldardaǵy shaǵyn jáne orta bıznestiń damýyna yqpalyn tıgizedi.

Turǵyn úı-kommýnaldyq sharýashylyǵynyń basshysy Dastan Amanovtyń aıtýynsha, qazirgi ýaqytta oblys halqynyń 88% nemese 752 myń adam gazben qamtylǵan. 2018 jyldyń sońyna deıin Áıteke bı aýdanyna qarasty Araltóbe aýyly men Hromtaý aýdanynyń Jazyq aýylyn gazben jabdyqtaý isi aıaqtalady.

Eldi túgeldeı gazdandyrý isi 2018 jyldyń naýryz aıynda Elbasy Nursultan Nazarbaev usynǵan bes áleýmettik bastamasynyń biri ekeni belgeli. Búginde respýblıkanyń 9 oblysyna gaz tartylǵan. Olardyń basym kópshiligi - ońtústik jáne batys ólkeler. Ortalyq jáne soltústik óńirler ázirge gazben jabdyqtalmaǵan.

Atalmysh máseleni sheshý úshin Prezıdent N. Nazarbaev Qaraózek (Qyzylorda oblysy) - Jezqazǵan - Qaraǵandy - Temirtaý - Astana baǵyty boıynsha magıstraldik gaz qubyryn salý týraly usynys bildirdi