Aqtóbe oblysynyń 25 ákimine qyzmettik kólik berildi
AQTÓBE. QazAqparat - Aqtóbe oblysyndaǵy aýyl ákimderi 25 avtokólik aldy. Kóliktiń bári elimizde qurastyrylǵan, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysy ákimdiginiń aldyna «Nıva» markaly kólikter tizildi. Bul kólikterdiń bári aýyl ákimderine berildi. Óńir basshysy Berdibek Saparbaev bul Memleket basshysynyń aýyldy damytý jónindegi tapsyrmasyn oryndaý úshin qabyldanǵan kóptegen sharalardyń biri ekenin atap ótti.
«Oblystaǵy aýyldyq okrýgter bir-birinen qashyq ornalasqan. Sondyqtan aýyl ákimderine arnalǵan mashınalarǵa qajettilik boldy. Olar tapsyrylǵan aýmaqtaǵy tártipti qadaǵalap, bolǵan oqıǵalarǵa shuǵyl áreket etýi tıis. Kólikter jańardy. Endi sizder halyqpen tyǵyz baılanys ornatasyzdar dep úmittenemin. Eń bastysy, sizder memlekettik qyzmetshiler ekenderińizdi umytpańyzdar, Otanymyzdyń ıgiligi úshin jumys jasańyzdar», - dedi Berdibek Saparbaev.
Aıta keteıik, oblystaǵy 147 aýyldyq okrýgtiń 146-y qyzmettik kólikpen qamtamasyz etildi. Tek Taldysaı aýyldyq okrýginiń ákimdiginde qyzmettik kólik bolmady. Búgin aýyl ákimi alǵashqylardyń biri bolyp Qazaqstanda qurastyrylǵan «Nıva» markaly kóliktiń kiltin aldy.
Aqtóbe oblysy ákiminiń baspasóz qyzmetiniń habarlaýynsha, ótken jyldyń tamyz aıynda quqyq qorǵaý organdaryna 180 avtokólik berildi. Óńirde polıtsııa ınspektorlary 100 paıyz qyzmettik avtokólikpen qamtamasyz etildi.
«Biz aýyl dárigerlerin mashınalarmen qamtamasyz etýdi josparlap otyrmyz. Búgingi kúni avtokóligi joq shaǵyn eldimekenderde shamamen 30 medıtsınalyq mekeme bar. Jyldyń sońyna deıin biz olardy tolyǵymen qamtamasyz etemiz», - dedi Berdibek Saparbaev.
