Aqtóbe oblysyndaǵy joldar ashyldy
AQTÓBE. QazAqparat – Búgin tańerteń aýa raıy jaqsarǵandyqtan Aqtóbe oblysyndaǵy respýblıkalyq jáne oblystyq mańyzy bar kólik joldary ashyldy, dep habarlaıdy Qazaqparat tilshisi Tótenshe jaǵdaı departamentine silteme berip.
Keshe aımaqtaǵy biraz joldar jabylyp, eskertý jarııalanǵan bolatyn.
«Oblystyq Jolaýshylar kóligi jáne avtomobıl joldary basqarmasy aýa raıynyń jaqsarýyna oraı oblystyq mańyzy bar Shubarqudyq-Oıyl-Qobda-Sol Iletsk (0-265 shaqyrym, Shubarqudyq-Qobda aýyly.) avtojoly men Aqtóbe-Bolgarka-Shubarqudyq (17-190 shaqyrym, Sazda-Shubarqudyq aýyly.) aýmaǵyndaǵy kólik qatynasy retke keltirildi.
Sonymen qatar, aýa raıynyń jaqsarýyna qaraı Quraıly eldimekeninen bastap Reseı shekarasyna deıingi Aqtóbe-Mártók-Reseı Federatsııasynyń shekarasy respýblıkalyq mańyzy bar avtojoldaǵy shekteý alynyp tastaldy. Bul joldar keshe kóktaıǵaqqa baılanysty jabylǵan bolatyn», - dep atap ótti TJD baspasóz qyzmeti.
