Aqtóbe oblysyndaǵy sý tasqynyna baılanysty komıssııa quryldy

AQTÓBE. QazAqparat – Aqtóbe oblysy Qobda aýdanynda úıler áli de sý ortasynda tur. Búgin turǵyndarmen oblys ákimi Eraly Toǵjanov kezdesip, komıssııa qurylǵanyn aıtty, dep habarlaıdy QazAqparat tilshisi.

Qobda aýdanyna sý keshe kirdi. Barlyǵy 15 úıdi sý basty. Sonymen birge dene shynyqtyrý-saýyqtyrý kesheni, dámhana aýmaǵyn saqtap qalý múmkin bolmady. Aýdan ortalyǵyndaǵy sý deńgeıi kóterilgen kezde Samara-Shymkent tasjolynyń bir bóligin jyryp, jol qozǵalysyn shekteýge týra keldi.

Búgin tótenshe jaǵdaı bolǵan jerge oblys ákimi Eraly Toǵjanov bardy. «Samara-Shymkent» halyqaralyq mańyzy bar joldyń 613-shaqyrymynda sý ótkizgish qubyrlardy ornatý jáne ınertti materıaldarmen toltyrý jónindegi jumysty aıaqtaýdy tapsyrdy. Turǵyndarmen kezdesý barysynda oblys ákimi Eraly Toǵjanov zardap shekken ár otbasyǵa qajetti kómek beriletinin atap ótti.

«Aýdanda komıssııa qurylyp, úıler tekseriletin bolady. Biz barlyǵyna qoldaý kórsetemiz, qarajat bólemiz, múmkindiginshe tez qalpyna keltiremiz. Bul jaǵdaıǵa muqııat taldaý júrgizilip, sý tasqynynyń qaıtalanýyna jol bermeý sharalary qabyldanady»,- dedi Eraly Toǵjanov. Qobda aýdanyndaǵy jaǵdaı oblys ákiminiń jeke baqylaýyna alyndy.

«Saman kirpishten salynǵan úıge sý kirdi. Al mal qoramyz sýǵa ketti. Sodan qulap, jermen-jeksen boldy. Bári keshkilik bastaldy. Sý bir saǵatta úıge kirip keldi. Balalardy jetektep, qujatymyzdy qol ustap shyqtyq. Kıip júrgen kıimimizben júrmiz. Jóndeýdi byltyr ǵana jasaǵan edik. Óte ókinishti. Sýdyń qaıtatyn túri joq», - dedi aýdan turǵyny Balaýsa Dánekeshova.

Aıta keteıik, bul aýdanda dál osyndaı sý nópiri 1993 jyly kelgen. Ol kezde eńiste turǵan úılerge sý kirgen.