Aqtóbe oblysyndaǵy seriktestik ekologııa talaptaryn óreskel buzǵan – mınıstrlik

NUR-SULTAN. QazAqparat – Ekologııa, geologııa jáne tabıǵı resýrstar mınıstrligi Aqtóbe oblysyndaǵy kásiporyndy tekserip, ekologııalyq zańnamanyń óreskel buzylǵanyn anyqtady, dep habarlaıdy QazAqparat mınıstrliktiń baspasóz qyzmetine silteme jasap.

Baspasóz qyzmetiniń málimetterine qaraǵanda, Aqtóbe oblysy Alǵa aýdany Bestamaq aýylynyń turǵyndary «Parıjskaıa kommýna XXI» JShS mal sharýashylyǵy kásipornynyń qyzmetine qatysty aımaqtyń ekologııa departamentine shaǵymdandy. Jaqynda júrgizilgen jospardan tys tekserý barysynda, qazylǵan transheıalarda bıologııalyq jáne qurylys qaldyqtaryn ishinara kómý arqyly aralas túrde ornalastyrý faktisi anyqtaldy. Ornalastyrý alańy 5,6 ga qurady. Bul rette, ekologııalyq jobada janýarlardyń qaldyqtaryn qaıta óńdeý kózdelgen. «Topyraq synamalarynyń hımııalyq taldaýy alańda lastaýshy zattardyń 26 myń m2 astam kontsentratsııasynyń artýyn kórsetti. Sonymen qatar, 40 myń bas shoshqaǵa arnalǵan mal sharýashylyǵy kesheninde 51 myńnan astam bas bolǵan. Anyqtalǵan ekologııalyq zańnamany buzǵany úshin Departament kásiporynǵa qatysty 11 ákimshilik is qozǵaldy. Sondaı-aq, suratylǵan málimetterdi berýge kedergi keltirgeni úshin 3 ákimshilik hattama toltyryldy»,-delingen habarlamada.

Atalǵan fakti boıynsha qylmystyq is qozǵaldy. Qazirgi ýaqytta, kásiporynnyń qorshaǵan ortaǵa keltirgen zalaldarynyń somasy eseptelýde. Budan basqa, qaldyqtardy ornalastyrý jáne sarqyndy sýlardy aǵyzý bóliginde JShS qyzmetin toqtata turý týraly talap aryzǵa bastama jasalatyn bolady.