Aqtóbe oblysyndaǵy «Qandyaǵash-Maqat» tasjolynyń 154 shaqyrymy jyl sońyna deıin tapsyrylady
NUR-SULTAN. QazAqparat - Aqtóbe men Atyraý oblystarynda respýblıkalyq mańyzy bar «Qandyaǵash-Maqat» tasjolyn rekonstrýktsııalaý jalǵasýda, dep habarlaıdy QazAqparat tilshisi.
QR Indýstrııa jáne ınfraqurylymdyq damý mınıstrligi baspasóz qyzmetiniń derekterine qaraǵanda, aýqymdy jumystar jobanyń alty ýchaskesinde júrgizilip jatyr. Olar keler jyly aıaqtalady dep kútilýde.
Jobanyń jalpy uzyndyǵy 299 shaqyrymdy quraıdy. Qazirgi tańda jer tósemin salý men iri túıirli asfaltbetonnan tómengi jáne qıyrshyqtas-mastıkalyq asfaltbetonnan joǵary qabatty ornatý jumystary júrgizilip jatyr. Budan bólek, sý ótkizý qubyrlary men mal ótkelderin montajdaý da júzege asýda. Joldyń 160-220 shaqyrymdarynda jumystardyń 90%-y atqarylǵan.
Jobanyń merdigerleri – «Todini Construzioni Generali S.p.A», «Akkord qurylys óndiristik ınvestıtsııalyq korporatsııasy» AAQ» BK, «Shanghai Construction Group Co., Ltd», «Aq jol kurylys» JShS men «Ant Insaat Maden Sanayi A.S.».
Bıyl qozǵalys Aqtóbe oblysynyń 154 shaqyrymynda jáne Atyraý oblysynda tósemniń tómengi qabaty boıynsha 128 shaqyrymynda ashylady dep josparlanyp otyr.
Rekonstrýktsııanyń nátıjesinde «Qandyaǵash-Maqat» tasjoly ІІ tehnıkalyq sanatqa sáıkestendiriledi. Al bul óz kezeginde joldaǵy ýaqyttyń qysqarýyna septigin tıgizbek.
Aıta keteıik, bıyl Qazaqstanda qurylys pen qaıta jańartý jumystarymen respýblıkalyq mańyzy bar avtojoldardyń 4 myń shaqyrymy qamtylǵan.
