Aqtóbe oblysyndaǵy Elek ózeniniń lastaný máselesin qalaı sheshýge bolady
Ózenniń lastanýy 1957 jyly Aqtóbe hrom qosyndylary zaýytynyń iske qosylýymen tikeleı baılanysty.
«Elek ózeniniń boıynda turatyn turǵyndardyń densaýlyǵy men turmysyna lastaýshy zattardyń áserin boldyrmaý úshin ózendi hrom men bordan tazartý sharalaryn júrgizý qajet. Búgingi kúni merdiger «Geoterm» JShS dala jumystaryn júrgizip, uńǵymalardan jáne jer ústi kózderinen sý synamalaryn aldy. Dınamıka baǵalandy, Elek ózenindegi alty valentti hrom deńgeıine boljam jasaldy, ekologııalyq sharalar taldandy, lastaný kózin joıý ádisteri boıynsha usynystar daıyndaldy», - deıdi aımaqtaǵy Ekologııa departamenti basshysynyń orynbasary Talap Ýsnadın.
Zertteý nátıjeleri Elek ózeniniń jer asty sýlarynyń alty valentti hrommen lastaný kózin joıýdyń tehnıkalyq-ekonomıkalyq negizdemesin ázirleýge negiz bolǵan. Ekologııa departamentiniń synaq zerthanasy jumys kestesine sáıkes Elek ózenine aı saıyn monıtorıng júrgizedi. Mártók aýdany jáne Aqtóbe qalasy Kókpekti eldi mekeniniń irgeles aýmaǵyndaǵy Elek ózeni sýlarynda aı saıynǵy josparly jumystardy júrgizý kezinde alty valentti hrom men bor quramynyń ártúrli kórsetkishteri (shekti ruqsat etilgen kontsentratsııalardyń tómendeýi nemese joǵarylaýy) anyqtalady.
Ekologtar keıinnen respýblıkalyq bıýdjetten jobalyq-smetalyq qujattama ázirleı otyryp, tehnıkalyq-ekonomıkalyq negizdemege túzetýler engizýdi usynyp otyr. Qazirgi ýaqytta jer asty sýlaryndaǵy hrom men bordyń kózderin zertteý qajet. Lastaýshy zattardyń ózen boıynda turatyn halyqtyń densaýlyǵy men turmysyna áserin boldyrmaý úshin ózendi hrom men bordan tazartý boıynsha tıisti sharalardy qolǵa alý kerek. Bul másele turaqty baqylaýda.
Sondaı-aq, Alǵa qalasyndaǵy burynǵy S.Kırov atyndaǵy hımııa zaýytynyń aýmaǵynda ornalasqan qaýipti qaldyqtardy joıý boıynsha jobalyq-smetalyq qujattamaǵa ózgerister engizip, jobany osy qujattamaǵa sáıkes júzege asyrý qajet.
Talap Ýsnadınniń aıtýynsha, oblys ákimdiginiń tapsyrysy boıynsha óndiristik alańdy zertteý jumystary júrgizilgen. Zaýyt aýmaǵyndaǵy qaldyqtardyń kólemi men quramy anyqtaldy. Sot sheshimimen anyqtalǵan qaldyqtar ıesiz dep tanylyp, respýblıkalyq menshikke qabyldandy. Elek ózeniniń bormen lastanýyn zertteý sharalary, ony zalalsyzdandyrý boıynsha ǵylymı-zertteý jáne tájirıbelik-eksperımenttik jumystar júrgizildi.
