Aqtóbe oblysynda jyl basynan koronavırýstan 2 júkti áıel qaıtys boldy
AQTÓBE. QazAqparat – Aqtóbe oblysynyń bas dárigeri Rústem Isaev balalarmen qatar júkti áıelderden de koronavırýs ınfektsııasy jıi anyqtalyp jatqanyna alańdady. Osy oraıda, Aqtóbe medıtsına ortalyǵynda vırýs juqtyrǵan júkti áıelderge bólimshe ashyldy, dep habarlaıdy QazAqparat tilshisi.
Ótken táýlikte óńirde taǵy 125 adamnan koronavırýs ınfektsııasy anyqtaldy. Aqtóbe qalasynda áli de bolsa ósim bar, 82 adam vırýs juqtyryp, dáriger kómegine júgingen. Sonymen birge Alǵa, Áıteke bı, Qobda, Muǵaljar men Hromtaý, Temir aýdandarynda derttiń sımptomdy túrine shaldyqqandar bar. Jalpy búginge deıin oblysta 8 myńǵa jýyq adam COVID-19 juqtyryp, olardyń 72 paıyzdan astamy jazyldy.
«Qazir qosymsha ınfektsııalyq statsıonar daıyndalyp jatyr. Kereýet sanyn kóbeıtý máseleni sheshpeıdi. Ári tek konoravırýs ınfektsııasy emes, adam ómirine qaýip tóndiretin ózge de aýrý jetkilikti. Sondyqtan turǵyndar meılinshe saq bolýy tıis. Dertke shaldyqqandardyń «jasaryp» bara jatqanyn da esten shyǵarmaǵan jón. Qazir 97 bala baqylaýda bolsa, jeteýi statsıonarda jatyr. Onyń bireýiniń jasy áli 1-ge tolmady», - dedi Aqtóbe oblystyq Densaýlyq saqtaý basqarmasynyń basshysy Rústem Isaev.
«Brıtandyq shtamm» da aqtóbelikter úshin qaýip tóndirip tur. Barlyǵy 4 adam vırýstyń osy túrin juqtyrǵany anyqtaldy.
«Qazirgi kezde 30-dan astam júkti áıelden koronavırýs ınfektsııasy anyqtaldy. Sol sebepti Aqtóbe medıtsına ortalyǵynda vırýs juqtyrǵan júkti áıelderge arnaıy bólimshe ashyp qoıdyq. Jyl basynan beri eki júkti kelinshek COVID-19 dertinen kóz jumdy», - dedi Rústem Isaev.
