Aqtóbe oblysynda jyl basynan beri 348 jol jóndelgen
NUR-SULTAN. QazAqparat – Aqtóbe oblysynda jyl basynan beri 348 jol jóndelgen. Búgin Ortalyq kommýnıkatsııalar qyzmetinde ótken brıfıngide Aqtóbe oblysynyń ákimi Ońdasyn Orazalın osyndaı málimet keltirdi, dep habarlaıdy QazAqparat tilshisi.
«Osydan on jyl burynǵy málimetterge súıensek, ol kezde jaqsy jáne qanaǵattanarlyq jaǵdaıdaǵy joldardyń úlesi nebary 42% bolǵan eken, al 2019 jyly 56,5% quraǵan.
Búgingi kúni oblysta jaqsy jáne qanaǵattanarlyq jaǵdaıdaǵy joldardyń úlesi 61% quraıdy. Osy baǵytta áli de kóptegen jumystar júrgizilýde», - dedi O.Orazalın.
Onyń sózine qaraǵanda, bıyl 14,3 mlrd teńgege 348 shaqyrym jol jóndelgen.
«Jalpy, jyl qorytyndysy boıynsha 450 shaqyrymnan astam joldy jóndeýdi josparlap otyrmyz. Sonyń nátıjesinde jalpy alǵanda jaqsy jáne qanaǵattanarlyq jaǵdaıdaǵy joldardyń úlesi 66% jetýi tıis.
Atap aıtqanda, «Aqtóbe qalasynyń ońtústik aınalma jolyn», «Aqtóbe-Orsk», «Qobda-Mártók» avtomobıl joldaryn qaıta jańartý jáne kúrdeli jóndeý syndy iri jobalardy aıaqtaý josparlanyp otyr», - dedi aımaq basshysy.
Aıtýynsha, mundaǵy jóndeý jumystary 1-2 jyldyń ishinde tolyq aıaqtalady.
