Aqtóbe oblysynda jurtqa keń tanylǵan mıneraldy sý qaıta shyǵarylmaq
AQTÓBE. QazAqparat - Aqtóbe oblysynda bir kezderi áıgili bolǵan Shalqar mıneraldy sýy qaıta shyǵaryla bastaıdy. Shalqar aýdanynda buryn toqtaǵan kásiporynǵa jańa ınvestor keldi, dep habarlaıdy «QazAqparat» HAA tilshisi oblys ákimdiginiń baspasóz qyzmetine silteme jasap.
Shalqar mıneraldy sýy 1961 jyly tabylǵan, kezinde burynǵy Odaqtyń búkil dárihanalarynda satylýshy edi. Táýelsizdik jyldary kásiporynnyń isin «Kóktas Aqtóbe» JShS qolǵa aldy, biraq birneshe jyl buryn belgisiz sebeptermen óndiris toqtaǵan.
«Kásiporyndy «Qazaqstan mıneraldy sýlary» JShS satyp aldy. Qazir tsehta kúrdeli jóndeý júrip jatyr, Eýropadan qondyrǵylar ákelinýde. Shalqarda aldaǵy ýaqytta mıneraldy sýdan tys, shıshaǵa, polıetılentereftalat bótelkege quıylǵan spırtsiz sýsyndar da shyǵarylady. Jalpy 780 mıllıon teńge mólsherinde ınvestıtsııa quıyldy. Jospar boıynsha naýryz aıynyń ortalarynda ónim óndire bastaımyz», - deıdi «Qazaqstan mıneraldy sýlary» JShS dırektory Raýshan Qonaqbaeva.
