Aqtóbe oblysynda júrgizýshi kóligimen birge ózenge batyp ketti
AQTÓBE. QazAqparat – Aqtóbe oblysy, Muǵaljar aýdanynyń turǵyny kóligimen birge ózenge batyp ketti, dep habarlaıdy QazAqparat tilshisi.
Muǵaljar aýdany Elek ózeniniń jaǵasynda qaıǵyly jaǵdaı tirkeldi.
«Qandyaǵash qalasynyń eki turǵyny Elek ózeniniń jaǵasynda júrip, «Volkswagen Passat» avtokóligimen jartastan ózenge qulaǵan. Apat saldarynan 59 jastaǵy júrgizýshi avtokólikten shyǵa almaı, sýǵa batyp ketken. Al 45 jastaǵy jolaýshy aýrýhanaǵa jatqyzyldy. Polıtsııa avtokólikti ózennen aýyr tehnıkanyń kómegimen alyp shyqty. Saraptama taǵaıyndaldy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, bıyl óńirde 20-den astam adam sýǵa batyp ketti. Onyń tórteýi bala.
