Aqtóbe oblysynda jumysynan qala beretin sheneýnik qyzmetinen bosatyldy

AQTÓBE. Qazaqparat - Aqtóbe oblysynda jumysynan qala beretin memlekettik qyzmetshi qyzmetinen bosatyldy. Onyń ústinen áriptesteri ádep jónindegi keńeske shaǵymdanǵan, dep habarlaıdy QazAqparat tilshisi.

Shalqar aýdany aýyl sharýashylyq ınspektsııasynyń basshysy jumysqa kelmegeni bylaı tursyn, qolastyndaǵy qyzmetkerlerine ne nusqaý bermegen, ne joǵary jaqtan kelip jatqan tapsyrmalardy oryndaýǵa kúsh salmaǵan. Keıin basshynyń máselesi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamentinde, ádep jónindegi keńeste qaralǵan.

«Óziniń jumysyna nemquraıly qaraıdy degen aryz-shaǵymdy teksergende,  máseleniń barlyǵy rastaldy. Biz ol kisini qyzmetinen bosattyq», - deıdi departament basshysy Qaıyrjan Tokýshev.

Jalpy, Aqtóbe oblysy boıynsha, jyl basynan beri ádep jónindegi keńestiń 12 otyrysy ótken. Komıssııa sheneýnikterge qatysty  22 isti qarap, onyń ishinde 2 memlekettik qyzmetshini jumystan bosatýǵa sheshim shyǵarǵan. 12 adam óziniń atqaryp otyrǵan qyzmetine saı bolmaı shyqty.

Zada Zeıin