Aqtóbe oblysynda júk jáne jeńil kólik soqtyǵysty, 4 adam aýrýhanada
AQTÓBE. QazAqparat – Aqtóbe oblysynda júk jáne jeńil kólik soqtyǵysyp, tórt adam aýrýhanaǵa tústi, dep habarlaıdy QazAqparat tilshisi.
Samara-Shymkent tasjolynyń 823-shaqyrymynda, ıaǵnı Hromtaý aýdany Abaı kentiniń mańynda jol-kólik oqıǵasy boldy.
«Lada Granta» markaly avtokóliktiń júrgizýshisi Hromtaýdan Aqtóbe qalasyna baǵyt alǵan. Ol aýa raıy jaǵdaıyn eskermeı, joldyń kóktaıǵaq ýchaskesinde qarsy jolaqqa shyǵyp ketken. Saldarynan «DAF» markaly júk avtokóligimen soqtyǵysty.
«Jol-kólik oqıǵasynan «Lada Granta» avtokóliginiń 4 jolaýshysy Hromtaý qalasynyń ortalyq aýrýhanasyna jatqyzyldy. Onyń ekeýi kámeletke tolmaǵan qyz. Qazir tergeý júrip jatyr.
Oblystyq Polıtsııa departamenti jol qozǵalysyna qatysýshylardy jol erejelerin qatań saqtaýǵa shaqyrady», - dedi oblystyq Polıtsııa departamenti baspasóz qyzmetiniń jetekshisi Erbolat Sarqulov.
