Aqtóbe oblysynda jolda qalǵan 8 adam qutqaryldy
ASTANA. QazAqparat - Aqtóbe oblysynda avtobýs buzylyp, jolda qalǵan 7 ózbekstandyq pen 1 qazaqstandyq azamat qutqaryldy. Bul týraly QR ІІM Tótenshe jaǵdaılar komıtetiniń resmı ókili Nursultan Nurahmetov málim etti, dep habarlaıdy QazAqparat tilshisi.
Onyń dereginshe, búgin tańerteńgi saǵat 9 shamasynda Aqtóbe oblysyna qarasty Hromtaý aýdanynyń Don eldi mekeniniń tusynda, «Samara-Shymkent» avtojolynyń 854 shaqyrymynda «Neoplan» markaly avtobýs buzylyp, jolda qalǵan. Oqıǵa ornyna Aqtóbe oblystyq tótenshe jaǵdaılar departamentiniń eki qyzmetkeri arnaıy kólikpen barǵan.
«8 adam qutqaryldy. Onyń jeteýi Ózbekstan azamaty bolsa, bireýi - qazaqstandyq. Barlyǵy da Hromtaý aýdanyndaǵy «Amanat» dámhanasyna jetkizildi», - dedi Nursultan Nurahmetov.
