Aqtóbe oblysynda jol apatynan 5 adam kóz jumdy
AQTÓBE. QazAqparat – Samara-Shymkent tasjolynda júk jáne jeńil kólik soqtyǵysyp, bes adam kóz jumdy, dep habarlaıdy QazAqparat tilshisi.
Aqtóbe oblystyq polıtsııa departamentiniń habarlaýynsha, oqıǵa 30 qańtkr kúni saǵat 19:20-da boldy.
«Mersedes-ACTROS» markaly júk kóliginiń júrgizýshisi Hromtaýdan Aqtóbe qalasyna qaraı baǵyt alyp, Ólke aýyly mańynda meteorologııalyq jaǵdaıdy eskermeı, taıyp, qarsy qozǵalys jolaǵyna shyǵyp ketken. Saldarynan 34 jastaǵy júrgizýshiniń basqarýyndaǵy «Toyota Camry-55» markaly avtokóligimen soqtyǵysqan. Jol-kólik oqıǵasy saldarynan «Toyota Camry-55» avtokóliginiń júrgizýshisi men tórt jolaýshy alǵan jaraqatynan oqıǵa ornynda kóz jumdy»,- dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, QR QK 345-babynyń 4-bóligi boıynsha is qozǵalyp, tirkeldi.
Polıtsııa departamenti jol qozǵalysynyń barlyq qatysýshylaryn jol qozǵalysy erejesin múltiksiz saqtaýǵa shaqyrady.
