Aqtóbe oblysynda jol apatynan 3 adam kóz jumdy
AQTÓBE. QazAqparat - Aqtóbede jol-kólik apaty saldarynan úsh adam kóz jumdy, dep habarlaıdy QazAqparat tilshisi.
Oqıǵa 21 maýsym kúni saǵat 17:21-de «Qarabutaq-Qostanaı» avtojolynyń 171-shaqyrymynda boldy.
«Lifan» avtokóliginiń 57 jastaǵy júrgizýshisi qarsy bettegi jolaqqa shyǵyp ketip, Reseı azamatynyń basqarýyndaǵy «Man» júk avtokóligimen soqtyǵysty.
Saldarynan «Lifan» avtokóliginiń júrgizýshisi, 41 jáne 62 jastaǵy eki jolaýshy oqıǵa ornynda kóz jumdy.
«Sonymen qatar 52 jastaǵy áıel men 48 jastaǵy er adam Áıteke bı aýdandyq aýrýhanasyna jetkizildi. Ókinishke qaraı kólik júrgizýshileri men jaıaý júrginshiler jol erejesin saqtamaı, qaıǵyly jaǵdaıǵa dýshar bolyp jatady», - deıdi Aqtóbe oblysy Polıtsııa departamentiniń bastyǵy Atyǵaı Arystanov.
