Aqtóbe oblysynda jol apatyna túsken taǵy bir oqýshy kóz jumdy

AQTÓBE. QazAqparat - Shalqar-Bozoı trassasynda bolǵan kólik apaty saldarynan aýrýhanaǵa túsken oqýshy qyz kóz jumdy, dep habarlaıdy QazAqparat tilshisi.

Jol apaty 4 naýryz kúni saǵat 20:55-te Shalqar-Bozoı tasjolynda bolǵan edi. Toyota Land Cruiser avtokóligin tizgindegen kámeletke tolmaǵan bala rýlge ıe bola almaı, mashına aýdarylǵan. Kólikte 5 oqýshy bolǵan – bir qyz bala oqıǵa ornynda qaza boldy, úsh ul men taǵy bir qyz aýrýhanaǵa tústi.
«Ókinishke qaraı es-tússiz jatqan jasóspirim qyz saǵat 18:30-da qaıtys boldy. Qalǵan eki balanyń jaǵdaıy turaqty, dárigerlerdiń baqylaýynda», - dep habarlady oblys ákiminiń baspasóz qyzmetinen.
Aqtóbe oblystyq densaýlyq saqtaý basqarmasy basshysynyń orynbasary Bekbolat Іzbasarovtyń aıtýynsha, 2008 jyly týǵan eki balanyń aıaǵy synǵan. Ekeýi de oblystyq balalar aýrýhanasyna jatqyzyldy. Taǵy bir bala jeńil jaralanyp, ambýlatorlyq baqylaýǵa alyndy.
Aıta keteıik, 4 naýryz kúni óńirde taǵy bir jol-kólik apaty boldy. Soltústik aınalma jolda KamAZ júk kóligi men Cobalt jeńil avtokóligi soqtyǵysty. Jeńil avtokóliktiń júrgizýshisi men úsh jolaýshysy – barlyǵy Ózbekstan Respýblıkasynyń azamattary oqıǵa ornynda kóz jumdy. Sotqa deıingi tergeý bastaldy jáne oqıǵanyń mán-jaıy anyqtalyp jatyr.