Aqtóbe oblysynda jol apaty saldarynan 3 tájikstandyq qaza tapty
AQTÓBE. QazAqparat – Samara – Shymkent tasjolynda jeńil kólik pen júk kóligi soqtyǵysyp, Tájikstan azamattary kóz jumdy, dep habarlaıdy QazAqparat tilshisi.
22 qańtar kúni saǵat 13:20-da Samara – Shymkent tasjolynyń 1139 shaqyrymynda jol apaty tirkeldi. «Toyota Camry 40» markaly kóliginde tórt jolaýshy bolǵan. Rýlde otyrǵan Tájikstan azamaty Qarabutaq aýylynan Qyzylordanyń Aral qalasyna baǵyt alyp, joldyń qarsy betine shyǵyp ketken. Kóktaıǵaq kezinde qarsy baǵytta kele jatqan «MAN» markaly ózbekstandyq júk kóligine soqtyǵysady.
«Jol-kólik oqıǵasy kezinde 2 adam sol jerde mert boldy. Úsheýi túrli dene jaraqatymen aýrýhanaǵa jetkizildi. Aýrýhanada taǵy bir tájikstandyq kóz jumdy. Aqtóbe oblystyq departamenti jol erejesin saqtap, qysta jyldamdyq saqtaýdy, aýa raıyna baılanysty joldyń qarsy betine shyqpaýdy eskertedi», - dedi oblystyq PD baspasóz qyzmetiniń jetekshisi Erbolat Sarqulov.
