Aqtóbe oblysynda jeti aıda 64 bala jol apatynan zardap shekken
AQTÓBE. QazAqparat - Jyl basynan beri Aqtóbe oblysynda balalardyń qatysýymen 54 jol apaty tirkeldi, onda 64 bala zardap shekken. Al ekeýi alǵan jaraqatynan qaıtys boldy, dep habarlaıdy QazAqparat.
Oblystyq polıtsııa departamentiniń málimetine sensek, jol-kólik oqıǵalarynyń ósýi jazǵy demalysqa baılanysty bolyp otyr.
Bul rette kámeletke tolmaǵan balalardyń qatysýymen bolatyn jol apattarynyń sebepteriniń biri - eresekterdiń balalardyń minez-qulqyna nemquraıly qaraýy.
Sondaı-aq, kóptegen júrgizýshiler «arnaıy balalar oryndyǵy nemese basqa quraldar bolmaǵan kezde 12 jasqa deıingi balalardy tasymaldaýǵa tyıym salýdy» kózdeıtin jol erejelerin saqtamaıdy.
Taǵy bir jaǵdaı - jaz bastalysymen jas velosıpedshiler (skýter, rolık ıeleri) qyzyǵýshylyqpen jazataıym oqıǵaǵa dýshar bolýy múmkin ekenin bilýi qajet.
Polıtsııa qyzmetkerleri júıeli túrde ata-analarmen jáne balalarmen profılaktıkalyq áńgime júrgizedi, jadynama taratady.
Sonymen qatar, jańa oqý jylynyń basynan bastap mektepterde jol qozǵalysy erejeleri boıynsha arnaıy sabaqtar ótkiziledi.
Eger árbir adam jol qozǵalysy erejelerin saqtasa, qalada úılesimdilik ornap, kólikpen baılanysty oqıǵalar sany azaıady.
Aqtóbe oblysynyń polıtsııa departamenti balany jol erejesin saqtaýǵa úıretýdi usynady.
«Velosıpedpen jáne motorollermen syrǵanaý kezinde balanyń kıiminde shaǵylysatyn elementter bolýy úshin shara qoldanyńyz. Balańyzdyń jolda «jarqyraýy» týraly oılanyńyz» dep eskertedi polıtsııa.
