Aqtóbe oblysynda jer úıde gaz jarylyp, tórt adam zardap shekti

AQTÓBE. QazAqparat – Alǵa aýdanyndaǵy jer úılerdiń birinde tabıǵı gaz jarylyp, úıdiń qabyrǵasy men shatyryn qıratyp jibergen. 4 adam jaralandy, dep habarlaıdy QazAqparat tilshisi QR Tótenshe jaǵdaılar departamentiniń baspasóz qyzmetine silteme jasap.

Oqıǵa Marjanbulaq aýylynda bolǵan.

«23 qańtar 17:40-ta «112» nómirine Aqtóbe oblysy Alǵa aýdany Marjanbulaq aýylynda Shámshi Qaldaıaqov kóshesindegi jer úılerdiń birinde gaz jarylǵany týraly habar kelip tústi. Oqıǵa ornyna 2 tehnıka men TJD eki qyzmetshisi bardy. Jarylys saldarynan tórt adam zardap shekti, olar oblystyq kópbeıindi aýrýhananyń travmatologııa bólimine jetkizildi. Qurbandar joq», - dep habarlady TJ departamentiniń baspasóz qyzmeti.

Dárigerler zardap shekkenderdiń jaǵdaıy qalypty deıdi. Olardyń denesin 9%-ten 19%-ke deıin túrli dárejede kúıik shalǵan.

Buǵan deıin 20 qańtarda Yrǵyz aýdany Nura aýylyndaǵy jer úılerdiń birinde gaz ballony jarylǵan. Jarylys saldarynan úıdiń qabyrǵasy qulap, órt shyqqan. Kóp uzamaı órt sóndirildi, úsh adam zardap shekti: 1965, 1994 jyly týǵan eki er adam men 1970 jylǵy áıel. Zardap shekkenderdiń denesiniń 25%-in kúıik shalǵan, olar Yrǵyz aýdandyq ortalyq aýrýhanaǵa jatqyzyldy.

Samal Endibaeva