Aqtóbe oblysynda jer úıde gaz jaryldy
AQTÓBE. QazAqparat - Aqtóbe oblysy Áıteke bı aýdanynyń ortalyǵy Komsomol aýylynda gaz jarylysynan úı qırap qaldy. Adamdar din aman. Olar qaýipsiz jerge kóshirilip, ýaqytsha baspana berildi, dep habarlaıdy QazAqparat tilshisi.
«Oqıǵa bolǵan jerge baryp, jaǵdaımen tanystym. Adamdarǵa esh qaýip tóngen joq. Aldyn ala málimet boıynsha, gaz qazandyǵynan esh aqaý bolmady. Tek gaz plıtasynan gaz shyǵyp ketip, ol jınalyp, úıge jalǵanǵan qurylysty qıratyp jibergen. Arnaıy komıssııa qurylyp, jumys júrgizip jatyr. Otbasyna ýaqytsha úı berilip, kóshirildi. Olarǵa kómek beriledi. Qalpyna keltirý jumystaryna jumysshylar kómektesedi», - dedi Áıteke bı aýdanynyń ákimi Málimbet Ibrashev.
Al úısiz qalǵan aýyl turǵyny Rýslan Tájimanovtyń aıtýynsha, qazir ol 4 balasymen páter jaldap turyp jatyr.
«Oqıǵa jeksenbi kúni boldy. Bári din aman. Jarylystyń neden bolǵanyn bilmeımiz. Ákimdik kelip qarady, ýaqytsha baspana berdi. Biraq berilgen úıde sý, jylý, ájethana da joq, balalardyń mektebine alys. Sondyqtan páter jaldadyq. Úıde anam, qaryndasym, barlyǵy 8 janbyz. Týma- týystarym kómektesip jatyr. Kóktemge qaıta salýǵa týra kelip tur», - dedi ol.
