Aqtóbe oblysynda Jastar jylynda 300-den astam is-shara ótedi
AQTÓBE. QazAqparat - Aqtóbe oblysynyń ákimi Berdibek Saparbaevtyń tóraǵalyǵymen ótken jıynda Aqtóbe oblysynda Jastar jylynda ótetin sharalardyń jospary qaraldy, dep habarlaıdy QazAqparat Aqtóbe oblysy ákimdiginiń baspasóz qyzmetine silteme jasap.
Otyrys jumysyna memlekettik organdardyń ókilderinen ózge jastar isi jónindegi qoǵamdyq uıymdardyń basshylary da qatysty. Oblys aýdandarynyń qoǵam belsendileri beınebaılanysqa qosyldy.
«Jastar jylynda oblys boıynsha 14-29 jas aralyǵyndaǵy 200 myńnan asa aqtóbelikti qamtıtyn barlyǵy 300-den asa, sonyń ishinde halyqaralyq jáne respýblıkalyq deńgeıdegi is-sharalar ótedi»,- dedi jastar saıasaty máseleleri jónindegi basqarma basshysy Nurlan Kúntýov.
Onyń aıtýynsha halyqaralyq jastar yntymaqtastyǵyn, eriktiler qozǵalysyn damytýǵa, qoǵamdyq sanany jańǵyrtý aıasynda jastarǵa áskerı-patrıottyq tárbıe berýge, mádenı, azamattyq jáne rýhanı-adamgershilik qundylyqtarǵa baýlýǵa kóńil aýdarylmaq.
Budan basqa, BUU DB qatysýymen jumyssyz jáne oqıtyn jastardy kásibı beıimdeý jáne jumyspen qamtý jumystary kúsheıtiledi.
«Jastardyń atalmysh sanaty jergilikti kásiporyndarǵa jumysqa ornalastyrylady, al BUU DB olardyń alǵashqy úsh aıǵy eńbegin óteıdi. Eger osy merzim ishinde jas qyzmetker ózin kórsete alsa, onda ol kásiporyn shtatyna alynady, al eger kerisinshe bolsa, onda ol BUU DB-ǵa óziniń áleýmettik jobasyn qarjylandyrýǵa tapsyrys bere alady.
Óńir basshysy talqylaýdy túıindeı kele Jastar jyly aıasyndaǵy barlyq sharalardyń naqty bir nátıjege baǵyttalýy kerektigin atap ótti.
«Atqarylǵan jumystyń tıimdiligin baǵalaıtyn maqsatty ındıkatorlardy anyqtap alý kerek. Jastardyń jumysqa ornalasý deńgeıiniń artýy, jastardyń qylmysqa barý deńgeıiniń tómendeýi jáne t.b. sekildi naqty qorytyndylar bolýy tıis. Sondaı-aq, jastardyń patrıottyq sezimin, Otanǵa degen súıispenshiligin týǵyzýǵa da aıryqsha nazar aýdarǵan mańyzdy. Bizder Elbasynyń jastardy qoldaý boıynsha tapsyrmasyn qoǵamdyq uıymdarmen kúsh biriktire otyra sapaly oryndaýymyz qajeti»,-dedi Berdibek Saparbaev.
