Aqtóbe oblysynda velosıped mingen jigitti kólik qaǵyp óltirdi
AQTÓBE. QazAqparat – Aqtóbe oblysyndaǵy tasjolda velosıped mingen 19 jastaǵy jigit kóz jumdy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Aqtóbe oblystyq PD baspasóz hatshysy Erbolat Sarqulovtyń sózine sensek, jol apaty 23 tamyz kúni Belqopa aýylyna jaqyn mańda, «Samara-Shymkent» tasjolynyń boıynda bolǵan. Velosıped aıdaǵan jigit rettelmegen jaıaý júrginshiler jolynda ketip bara jatqan.
«Lada-Prıora» kóliginiń júrgizýshisi - Aqtóbe oblysy Shalqar aýdanynyń turǵyny Qarabutaq aýylynan shyǵyp, Hromtaý qalasyn betke alyp kele jatqan. Belqopa aýylyna jaqyn mańda sol baǵytpen jaıaý júrginshiler jolynda ketip bara jatqan velosıpedshige jol bermeı, 19 jastaǵy jigitti qaǵyp ketken. Saldarynan jas jigit oqıǵa ornynda tilge kelmeı jantásilim etti», - deıdi Erbolat Sarqulov.
Atalmysh fakti boıynsha sotqa deıingi tergeý júrip jatyr.
