Aqtóbe oblysynda ushaqpen ushatyndar sany ósti
AQTÓBE. QazAqparat – «Aqtóbe» halyqaralyq áýejaıynda júk tasymaly artty, jolaýshylar sany ósti, dep habarlaıdy QazAqparat tilshisi oblys ákiminiń baspasóz qyzmetine silteme jasap.
Aqtóbe oblysynyń ákimi Ońdasyn Orazalın «Aqtóbe» halyqaralyq áýejaıynyń jumysymen tanysty. Bıyl áýejaıdy qardan, qoqystan tazalaıtyn jańa tehnıkalar satyp aldy. Bul baǵyttaǵy jumystarǵa 187 mln teńge bólindi. Jolaýshylardy tasymaldaýǵa arnalǵan eki avtobýs jańardy.
«Ótken jylmen salystyrǵanda jolaýshylar tasymaly 35%, júk tasymalýy 400% artty. Sonymen birge reıster sany 30% kóbeıdi. Qazirgi ýaqytta jolaýshylar reısi 4 ishki jáne 1 halyqaralyq baǵyt boıynsha aptasyna 80-nen astam reıs oryndalady. Júk reısteri 4 baǵytty qamtıdy. Aptasyna 20-dan astam reıs bar», - dep habarlady oblys ákiminiń baspasóz qyzmeti.
Aıta keteıik, bıyl 11 aıda áýejaıǵa túsetin qarjy kólemi 600 mln tg qurady. Basqarma tóraǵasy Dastan Malıevtiń aıtýynsha, 2019 jyly 470 tonna júk tasymaldansa, 2020 jyly 2000 tonnaǵa jetti. Qazir Nur-Sultan, Almaty áýejaılarynan keıingi úshinshi otyrda tur. Sondaı-aq bıyl jumysshylardyń jalaqysy orta eseppen 40% kóterilgen. Odan ózge áýejaıǵa jóndeý jumystary júrgizilip, jolaýshylarǵa yńǵaıly jaǵdaılar jasaldy. Oblys ákimi Ońdasyn Orazalın kútý zalyn aralap, áýejaıda júzege asyrylyp jatqan jumystardy qarady.
