Aqtóbe oblysynda úsh mektep ashyldy
AQTÓBE. QazAqparat – Aqtóbe oblysynda 3 mektep qoldanysqa berildi, dep habarlaıdy QazAqparat tilshisi.
Úsh mekteptiń biri – Aqtóbe qalasy Raýan eldi mekeninde №74 orta mektep. 300 oryndyq mektep qurylysy 2019 jyldyń tamyz aıynda bastalǵan bolatyn. Bilim oshaǵyna búgin oblys ákimi Ońdasyn Orazalın baryp, nysannyń qurylys sapasyn baqylap, ata-ana, oqýshylarmen kezdesti.
«Búgin Memleket basshysy Qasym-Jomart Kemeluly Toqaev Qazaqstan halqyna Joldaýyn jarııalady. Aýqymdy tapsyrmalardyń biri – bilim sapasyn damytý. Osy maqsatatta óńirde birqatar jumys iske asyp jatyr. Bolashaq urpaqqa sapaly tárbıe berý úshin olardyń jaǵdaıyn jasaýymyz qajet. Keń, zaman talabyna saı boı kótergen bilim oshaǵynda bilimdi, elge qyzmet eter azamattar tárbıelenedi dep senemin», - dedi óńir basshysy O.Orazalın.
№74 orta mektepte 26 oqý synyby, ınformatıka kabıneti, sheberhana, sport zaly, ashana, kitaphana, medıtsına kabıneti bar. Jylý qazandyǵy avtonomdy. Munda tabıǵı gaz qoldanylady. Mekteptiń paıdalanýǵa berilýi Raýan eldi mekeniniń turǵyndary úshin qýanyshty jańalyq boldy. Sebebi buǵan deıin balalary ózge mektepterge avtobýspen qatynap keldi.
Óńir ákimi mektep ishin aralap, kezekshi 1-synyptaǵy oqýshylarǵa sáttilik tiledi. Bilim basqarmasynyń basshysy Lázzat Orazbaevaǵa barlyq mektepte qaýipsizdik erejeleriniń qatań saqtalýyn qadaǵalaýdy tapsyrdy.
Aqtóbe oblysynda jańa oqý jyly qarsańynda 3 mektep paıdalanýǵa berildi. Jyl sońyna deıin taǵy 9 mektep oqýshylardy qabyldaýǵa daıyn bolmaq. Óńirde qazir 15 myńnan astam bala – dástúrli, 104 myńnan astam bala – qashyqtan, 38 myńnan astamy kezekshi synyptarda bilim alady. 1-synypqa qabyldanǵan oqýshylar sany – 18 000.
