Aqtóbe oblysynda turǵyndardyń narazylyǵyn týdyrǵan shoshqa fermasy jabylýy múmkin
AQTÓBE. QazAqparat - Aqtóbe oblysynyń ákimi Ońdasyn Orazalın búgin shoshqa fermasynyń jumysyna qarsylyq kórsetken topty qabyldady, dep habarlaıdy QazAqparat tilshisi.
Ońdasyn Orazalın Alǵa aýdany, Bestamaq aýylyndaǵy shoshqa fermasynyń las jumysyn áshkerelep, sharýashylyqtyń jabylýyn talap etken topty qabyldady.
«Júzdesý barysynda bastamashyl top músheleri kópshiliktiń oı-pikirin jetkizdi. Muqııat tyńdap, tıisti organdarǵa qysqa merzimde jáne shuǵyl is-shara júrgizýdi tapsyrdym. Qaı másele bolsa da ashýǵa salmaı, aqylǵa salyp sheshetin halyqpyz ǵoı. Bul problemanyń da ońtaıly sheshý joldaryn birge qarap, ortaq bir mámilege keldik.
Bul jerde eki másele bar:
Birinshiden, qorshaǵan ortaǵa keltirgen zııandy zattardy zalalsyzdandyrý, ótemaqy tólettirý jáne zań aıasynda jaýapqa tartý. Munymen quqyq qorǵaý organdary aınalysýda, tıisti tapsyrma berildi.
Ekinshiden, kópshiliktiń pikirin eskerip, tekseris qorytyndysynyń nátıjesimen «Parıjskaıa kommýna – XXI» JShS basshylyǵyna sharýashylyqtyń baǵytyn ózgertýge nemese múldem jabý týraly talap qoıylady. Bul máseleniń sheshilý merzimin anyqtaýdy arnaıy mamandarǵa tapsyramyn. Sharalar barysy ózimniń jeke baqylaýymda. Arnaıy qurylǵan komıssııa músheleri kúndelikti jumys barysyn baıandap otyr», - dep jazdy oblys ákimi.
Eske salsaq, Aqtóbe oblysynyń Alǵa aýdanynyń turǵyndary shoshqa fermasyndaǵy biraz kemshilikti atady. Olar fermada ishek-qaryndy joıý, ólekseni zalalsyzdandyrý jumystary júrgizilmeıtinin, kómý kezinde biraz talaptyń saqtalmaıtynyn aıtty. Qazir munda shoshqa soıý jumysy toqtap tur. Ekologtar da kemshiliktiń tirkelgenin rastady.
