Aqtóbe oblysynda turǵyn úı qurylysynyń 10 myńnan astam ýchaskesine ınjenerlik jeliler júrgiziledi
«Memleket basshysynyń tapsyrmasyna sáıkes, Aqtóbe oblysynyń áleýmettik-ekonomıkalyq damýynyń 2022-2025 jyldarǵa arnalǵan keshendi josparynyń jobasy ózektendirildi, tıisti memlekettik organdarmen kelisildi. Keshendi jospar jalpy somasy shamamen 1,7 trln teńge bolatyn alty baǵyt boıynsha 98 tarmaqty iske asyrýdy kózdeıdi. Keshendi jospardyń jańa jobasyna halyqtyń áleýmettik osal toptary men kópbalaly otbasylar úshin turǵyn úı salý, densaýlyq saqtý nysandarynyń qurylysy jáne bilim berý nysandaryn jańǵyrtý sııaqty áleýmettik jobalar qosyldy», - dedi Ońdasyn Orazalın.
Onyń aıtýynsha, jańa jumys oryndaryn qurý men ınvestıtsııalar tartý maqsatynda iri ınvestıtsııalyq jobalardy iske asyrý josparlanyp otyr. Jańartylatyn energııa kózderin damytý bóliginde jel elektr stantsııasyn jáne tıtan-tsırkonıı kenderin qaıta óńdeý jónindegi taý-ken baıytý keshenin salý, sondaı-aq óńdeý salasyna basa nazar aýdara otyryp, basqa da mańyzdy jobalardy júzege asyrý qarastyrylǵan.
«Budan basqa, sheteldik ınvestorlardy tarta otyryp, óńir aýmaǵynda erekshe ındýstrııalyq aımaq qurý josparlanǵan. Onyń aýmaǵyndaǵy kásiporyndardyń 70 paıyzy eksportqa baǵyttalatyn bolady. Sonymen qatar, agroónerkásiptik keshen salasynda da birqatar ınvestıtsııalyq jobalardy iske asyrý kózdelgen. Atap aıtqanda, qus fabrıkasynyń qurylysy, 2 myń bas iri qara malǵa arnalǵan eki bordaqylaý alańy, 800 bas iri qara malǵa arnalǵan eki sút-taýar fermasy jáne basqa da jobalar qamtylǵan. Nátıjesinde, keshendi josparǵa sáıkes 2025 jylǵa deıin shamamen 1,2 trln teńgege ınvestıtsııalyq jobalar iske asyrylatyn bolady», - dedi oblys ákimi.
Onyń sózine qaraǵanda, Úkimettiń qoldaý kórsetýi baǵytynda óńirde kóptegen jobalardy iske qosý josparlanǵan. Sonyń ishinde 2025 jylǵa deıin keshendi josparǵa sáıkes respýblıkalyq bıýdjetten shamamen 340 mlrd teńge kózdelgen. Avtojol qurylysyn júrgizý, 85 aýyldy gazdandyrý, 33 aýyldy sýmen qamtamasyz etý eskerilgen. Sonymen qatar, turǵyn úı qurylysynyń 10 myńnan astam ýchaskesine ınjenerlik-kommýnıkatsııalyq jeliler júrgizý jobalary josparlanǵan.
Budan bólek, jergilikti bıýdjet esebinen 220-dan astam mektepti jańǵyrtylyp, kolledj stýdentteri úshin eki jataqhana salý qamtylǵan.
Budan buryn habarlanǵandaı, búgin Úkimet otyrysynda elimizdiń batys óńirlerin keshendi damytýdyń josparlary tanystyryldy.
Jalpy, keshendi josparlardy iske asyrý batys óńirler ekonomıkasynyń ósý qarqynyn ulǵaıtýǵa múmkindik beredi, jeke ınvestıtsııalar aǵynyna serpin beredi jáne halyqtyń ómir súrý sapasy men ál-aýqatyn arttyrýdy qamtamasyz etedi. 2025 jylǵa qaraı tórt óńir boıynsha shamamen 13 trln teńge jeke ınvestıtsııa tartý, 175 myńǵa jýyq jańa jumys ornyn qurý kózdelgen.
