Aqtóbe oblysynda tórt kúnde 40 jol-kólik apaty boldy
AQTÓBE. QazAqparat – Aqtóbe oblysynda tórt kúnde 40 jol-kólik apaty boldy. Al jyl basynan beri joldaǵy oqıǵalar saldarynan 70-ten astam adam kóz jumdy, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 18 jeltoqsan kúni aýa raıynyń qolaısyzdyǵyna baılanysty Aqtóbe oblysynyń trassasynda úsh kóliktiń qatysýymen jol apaty boldy. «VAZ-21144» avtokóliginiń júrgizýshisi Jańaáljan tas jolynda jol júrý erejesin buzyp, qarsy jolaqqa shyǵyp ketken. Saldarynan «Lada-217030» kóligimen soqtyǵysqan. Keıin jeńil kólik qozǵalys baǵytyn ózgertip, «Volvo» avtokóligimen túıisken. «VAZ-21144» avtokóliginiń júrgizýshisi jedel medıtsınalyq járdem aýrýhanasyna jatqyzyldy.
«Árbir avtokólik ıesi «ara qashyqtyqty saqta» degen sózdi biletin shyǵar. Ásirese qys mezgilinde qaýip joǵary bolady. Kásibı júrgizýshiniń ózi aýa raıynyń kúrt ózgerýi kezinde aldaǵy qaýipti boljaı almaıdy. Jyl basynan beri Aqtóbede 70-ten astam adam jol apatynan kóz jumdy. Al ótken tórt kúnde óńirde 40 jol-kólik oqıǵasy tirkeldi. Bir jasqa tolmaǵan sábı men ájesi de kóz jumdy. Mundaı qaıǵyly oqıǵanyń aldyn alý úshin saqtyq sharasyn esten shyǵarmaǵan abzal», - dedi oblystyq Polıtsııa departamentiniń bastyǵy Atyǵaı Arystanov.
Aıta keteıik, qazir 100-ge jýyq patrýldik polıtsııa ekıpajy túrli baǵyttaǵy joldy baqylaýǵa aldy.
