Aqtóbe oblysynda tasyǵan sý respýblıkalyq mańyzy bar joldy jyryp ketti
AQTÓBE. QazAqparat – Aqtóbe oblysynda tasyǵan sý respýblıkalyq mańyzy bar joldy jyryp ketti, dep habarlaıdy QazAqparat tilshisi.
«QazAvtoJol» kompanııasynyń málimetinshe, birinshi sáýir kúni saǵat 17-00-de tasyǵan sý «Aqtóbe-Atyraý-RF shekarasy» respýblıkalyq mańyzy bar avtojoldyń Jarly aýylyna jaqyn tusyndaǵy 283 shaqyrymynda joldyń astyna tóselgen qubyrdy shaıyp ketken. Qazirgi ýaqytta jol ýaqytsha jóndelip, avtokólikterdiń barlyq túriniń qozǵalysyna ashylǵan.
Aıta keterligi, «QazAvtoJol» sý basyp ketý qaýpi bar ýchaskeler tizimi jasap, 250-den astam ýchaskeni anyqtady. Kompanııanyń ár óńirlik fılıaly kópir asty aımaqtardy, sý ótkizý qubyrlaryn qardan tazalap, ashyp jatyr. Sonymen birge kópir arnalaryn tazalaý, sý tasqynyn boldyrmaý úshin ınertti materıaldardy daıyndaý jumystary jalǵasýda.
Kún saıyn atalǵan jumystarǵa 600-ge jýyq arnaıy tehnıka jáne 1 myńnan astam jol qyzmetkeri jumyldyrylýda.
Foto: mgorod.kz
