Aqtóbe oblysynda taǵy bir joldy sý basý qaýpi bar: Ákim shuǵyl tapsyrma berdi

AQTÓBE. QazAqparat - Aqtóbe oblysynyń ákimi Eraly Toǵjanov Alǵa jáne Temir aýdandaryna baryp, sý tasqyny qaýpi basym aýmaqtardy qarap shyqty. Sý shaıyp ketýi múmkin joldardy qarap, bógetti bekitýdi tapsyrdy, dep habarlaıdy QazAqparat tilshisi.

Eraly Toǵjanov óńirdiń tótenshe jaǵdaılar departamentiniń mamandarymen birge aýmaqtaǵy kóktemgi sý tasqynyn boldyrmaý jumystaryn qarap shyqty. 400 shaqyrymdy quraıtyn áýe marshrýty Alǵa jáne Temir aýdandaryn qamtydy. Óńir basshysy Alǵa aýdanyn aralaǵan kezde Jeruıyq aýyly mańyndaǵy Jińishke ózeniniń bastaýyn, Qaıyńdysaı aýylynda eski Táńirbergen bógetin kórip, Kóltaban aýylyndaǵy eski Kóltaban bógetin qalpyna keltirý jumystarymen tanysty. Sý deńgeıin kórip, aýdan basshylyǵyna shuǵyl túrde Kóltaban bógetin qalpyna keltirýdiń jańa jobasyn ázirleýdi tapsyrdy.

«Sapar barysynda Temir aýdany aýmaǵyndaǵy «Shubarqudyq-Oıyl» avtojolynyń jaıymen tanysty. Kúnniń kúrt jylynýy men qalyń qar saldarynan avtojoldyń 16-shaqyrymynda sý shaıý qaýpi týyndady. Qabyldanǵan sharalardyń nátıjesinde qaýip seıildi. Erigen qar sýy sý ótkizgish qurylystar arqyly ótedi. Eraly Toǵjanov Temir aýdanynyń ákimine Shubar aýylynda aryq jelilerin salýdy tapsyrdy. Áýe marshrýty Sazdy, Tamdy ózenderiniń bastaýyn baǵamdaýmen qorytyndylandy. Ózenderdegi muz áli qatyp tur. Oblys ákimi óńirde sý tasqynyn boldyrmaý jumystary boıynsha turaqty monıtorıngti kúsheıtý qajettigin atap ótti»,- dep habarlady oblys ákiminiń baspasóz qyzmeti.

Eske salsaq, Baıǵanın aýdanynda eki joldy sý shaıyp, tórt aýylǵa qatynas shekteldi.