Aqtóbe oblysynda sýdy hlorlamaı ma
Komıtet múshesi Rashıt Ahmetovtiń aıtýynsha, aımaqta halyqty sapaly aýyz sýmen qamtamasyz etý aıasynda hlorlaý qondyrǵylary ornatyldy. Bul - sanıtarlyq erejelerdiń talaby. Alaıda atalǵan qondyrǵylar jumys istemeıdi. «Máselen, aýdıt kezinde Imanǵalı Biltabanov atyndaǵy aýylda hlorlaý qondyrǵysyn qoldanbaı jatqany anyqtaldy. Ol nysanǵa bıýdjetten 3,6 mln teńge jumsaldy. Jalpy, Aqtóbe oblysynda ornatylǵan hlorlaý qondyrǵylaryna 100,4 mln teńge ketti. Qazir taǵy 8,8 mln teńgege salynyp jatyr», - deıdi R.Ahmetov.
Komıtet tóraıymy Natalıa Godýnova da hlorlaý qondyrǵylardyń bos turǵanyna tań qaldy. «Ol qalaı? Aýdıtorlar tekserip qaraǵanda hlorlaý qondyrǵylary sol kúıinde turdy. Qalaı saldy, týra solaı jap-jańa, tsellofany da alynbaǵan. Tap-taza, biraq bári jabyq. Sonda ne úshin saldyq? Bıýdjet aqshasyn ne úshin bóldi? Densaýlyq saqtaý mınıstrliginiń buıryǵy bar emes pe? Sýdy hlorlap otyrý qajet qoı. Al hlorlaý qondyrǵylary tsellofanmen qaptalyp tursa, ol jumys qalaı atqarylady?», - dep surady N.Godýnova.
Aqtóbe oblysy ákiminiń orynbasary Oljas Smaǵulovtyń aıtýynsha, hlorlaý sharalaryn ótkizýdiń ózindik tártibi bar. «Iá, Qobda aýdanynda 3,6 mln teńgege hlorlaý qondyrǵysy ornatylǵan bolatyn. Ony paıdalanbaıdy deıdi. Biraq sońǵy dezınfektsııa aǵymdaǵy jyly maýsym aıynda jasaldy. Negizi, Ulttyq ekonomıka mınıstri bekitken sanıtarlyq normalar bar. Oǵan sáıkes, sýdy hlorlaý sharalary belgili bir ýaqytta atqarylady. Máselen, sýdyń sapasy nasharlasa, hlorlaý bastalady. Sosyn ınfektsııalyq aýrýlar men apattyq jaǵdaılar bolǵan jaǵdaıda hlorlaý qondyrǵysyn iske qosady», - dedi O.Smaǵulov.
Aıta keteıik, búgingi otyrysta Aqtóbe oblysynyń qarjylyq jumysyna júrgizilgen aýdıttiń nátıjesi jarııalandy. Al oblystyq jolaýshylar kóligi jáne avtomobıl joldary basqarmasynyń basshysy Aqtóbe-Atyraý tas jolynyń qurylysy týraly aıtyp berdi.
