Aqtóbe oblysynda sport aptalyǵy ótedi
AQTÓBE. QazAqparat - Aqtóbe oblysynda sport aptalyǵy ótedi. Bul týraly Óńirlik kommýnıkatsııalar qyzmetindegi baspasóz máslıhatynda oblystyq Dene shynyqtyrý jáne sport basqarmasynyń basshysy Meırambek Mahambetov málim etti, dep habarlaıdy QazAqparat. Bıyl Sport kúni bir apta boıyna merekelenetin bolady.
«10-18 tamyz aralyǵynda Aqtóbe qalasy men oblys aýdandarynda 15 iri is-shara ótedi, olarǵa 15 myń adam qatysady. Sporttyq jarystar Tuńǵysh Prezıdent atyndaǵy saıabaqta, BJSM, shahmat alleıasynda uıymdastyrylady. Sport aptalyǵy boıyna oblys turǵyndary aqtóbelik sportshylardyń ónerlerin kóre alady, júzýden, tennısten, zııatkerlik jáne sporttyń oıyn túrleri boıynsha ashyq esik kúnderi olarǵa kire alady», - dedi Meırambek Mahambetov.
16 tamyzda Tuńǵysh Prezıdent atyndaǵy saıabaqta grek-rım, erkin kúres, áıelder kúresi balýandary fleshmob kórsetedi. Sonymen qatar, «Kúrestiń 12 túrinen festıvaldiń» aqtyq kezdesýleri bolady.
Sport aptalyǵynyń negizgi oqıǵasy 18 tamyzda «Jekpe-jek» saraıynda ótedi, onda úzdik sportshylar men jattyqtyrýshylardy marapattaıdy, kórermender akrobattar men gımnastshylardyń shoýyn, krossfıtten jarysty qaraı alady. Sondaı-aq, osy shara aıasynda qonaqtar oblystyń bedeldi sportshylaryn basqa qyrynan tanı alatyn bolady.
Sport aptalyǵy 18 tamyzda keshkisin Tuńǵysh Prezıdent atyndaǵy saıabaqta úlken baǵdarlamamen jabylady.
