Aqtóbe oblysynda sheteldik erli-zaıyptylar jol apatynan kóz jumdy

AQTÓBE. QazAqparat - Aqtóbe oblysynda jol apatynan sheteldik otbasy qaza tapty, dep habarlaıdy QazAqparat polıtsııaǵa silteme jasap.

29 naýryz kúni «Aqtóbe-Astrahan» avtojolynyń 252-shaqyrymynda kólik apaty boldy.

Qaraýylkeldi aýylynyń mańynda KamAZ júk kóliginiń júrgizýshisi ekinshi joldan basty jolǵa shyǵyp, Datsun avtomobılimen soqtyǵysqan.

Jol-kólik oqıǵasy saldarynan Datsun kóliginiń 48 jastaǵy júrgizýshisi jáne onyń 49 jastaǵy áıeli oqıǵa ornynda kóz jumdy.

Olar Reseı Federatsııasynyń azamattary bolatyn.

«QR Qylmystyq kodeksiniń 345-baby 4-bóligi boıynsha sotqa deıingi tergeý bastaldy. Qurmetti júrgizýshiler, jol erejesin qatań saqtaýdy suraımyz»,- dep eskertti Baıǵanın aýdany polıtsııa bóliminiń bastyǵy Berik Aısın.