Aqtóbe oblysynda Reseıden qaıtar jolda buzylǵan avtobýs jolaýshylary qutqaryldy
ASTANA. QazAqparat - Samara-Shymkent tasjolynda Aqtóbe oblysynyń Yrǵyz kentine jaqyn jerde Reseıden Ózbekstanǵa jol tartqan avtobýs buzylyp qalǵan. Bul týraly Aqtóbe oblystyq ІІD baspasóz qyzmeti habarlady.
TJ 15 jeltoqsanda bolǵan. Buzylǵan avtobýs isi qaıǵyly oqıǵamen aıaqtalýy múmkin edi, sebebi aýa temperatýrasy 23 gradýs aıazdy kórsetip turǵan jáne jeldiń ekpini kúsheıgen.
Avtobýsta 48 Ózbekstan azamaty bolǵan. Olar Reseıde jumys istep, elderine qaıtyp kele jatqan. Oqıǵa ornyna kelgen Yrǵyz aýdandyq ákimshilik polıtsııa bóliminiń ınspektory jaǵdaıdy baǵalap, TJ arnaıy tehnıkasyn shaqyrǵan jáne jolaýshylardy kólikke otyrǵyzyp, jylytý beketine jetkizgen.
